गुळाच्या दरवाढीचा लाभ ऊस उत्पादक शेतकऱ्यांनाही द्या; मांडवगण फराटा येथे शेतकऱ्यांची जोरदार मागण
Rjnews27 मराठी – बालाजी कांबळे
ऊस दराच्या प्रश्नावर शेतकरी रस्त्यावर; गुऱ्हाळ चालक-मालकांनी बाजारभावाशी निगडित दर निश्चित करण्यासाठी पुढाकार घेण्याचे आवाहन
मांडवगण फराटा, ता. शिरूर, जि. पुणे | दि. ३० ऑगस्ट २०२६
शिरूर तालुक्यातील मांडवगण फराटा येथे ऊस दराच्या विविध प्रश्नांवर शेतकऱ्यांच्या वतीने रॅली काढून शासन, राजकीय नेते तसेच गुऱ्हाळ चालक-मालकांचे लक्ष वेधण्यात आले. ऊस उत्पादक शेतकऱ्यांना त्यांच्या उसाला योग्य व बाजारभावाशी सुसंगत दर मिळावा, या प्रमुख मागणीसाठी शेतकरी मोठ्या संख्येने सहभागी झाले होते.
या वेळी झालेल्या सभेत श्री. लक्ष्मण बापू फराटे यांनी ऊस उत्पादक शेतकऱ्यांच्या प्रश्नांवरून राजकर्त्यांचे कान टोचले. शेतकऱ्यांच्या आर्थिक अडचणी, उत्पादन खर्च आणि बाजारातील दर यांचा विचार करून ऊस दर निश्चित करण्याची गरज असल्याचे त्यांनी स्पष्ट केले. तसेच आजचा शेतकरी जागरूक आणि हुशार असून, विशेषतः तरुण पिढी शेती व शेतकऱ्यांच्या प्रश्नांसाठी पुढे येत असल्याचे सांगत त्यांनी तरुण शेतकरी वर्गाचे कौतुक केले.
गुळाच्या दरवाढीचा काही हिस्सा ऊस उत्पादकांना मिळावा
ऊस उत्पादक शेतकऱ्यांच्या वतीने गुऱ्हाळ चालक व मालकांना नम्र आवाहन करण्यात आले आहे. गुळाच्या विक्री दरावर आधारित ऊस उत्पादक शेतकऱ्यांना प्रति टन बाजारभाव ठरविण्यासाठी गुऱ्हाळ चालक-मालकांनी पुढाकार घ्यावा, अशी मागणी करण्यात आली आहे.
गुऱ्हाळ चालक व मालकांच्या अडचणी वाढविण्याची शेतकऱ्यांची कोणतीही भूमिका नसल्याचे स्पष्ट करत, गुळाच्या विक्री दरामध्ये झालेल्या वाढीचा काही प्रमाणात मोबदला ऊस उत्पादक शेतकऱ्यांनाही मिळणे आवश्यक असल्याचे शेतकरी कृती समितीच्या वतीने सांगण्यात आले.
“गुळाच्या दरात वाढ झाली असेल, तर गुऱ्हाळ चालक-मालकांनी आपल्या मोबदल्यात वाढ करून घ्यावी; मात्र त्याचवेळी ऊस उत्पादक शेतकऱ्यांच्या उसाच्या दरातही त्यानुसार वाढ करण्यात यावी,” अशी भूमिका शेतकऱ्यांनी मांडली.
दर वाढला तर उसाचा भाव वाढवा, कमी झाला तर कमी करा
गुळाच्या बाजारभावातील चढ-उतार शेतकऱ्यांना मान्य असल्याचेही यावेळी स्पष्ट करण्यात आले. गुळाचा दर वाढला तर उसाचा दर वाढवावा आणि गुळाचा दर कमी झाला तर त्यानुसार उसाच्या दरातही घट स्वीकारण्याची तयारी शेतकऱ्यांनी दर्शविली आहे. मात्र, ऊस आणि गुळाच्या बाजारभावामध्ये परस्पर संबंध ठेवून पारदर्शक पद्धतीने दर निश्चित करण्यासाठी गुऱ्हाळ चालक-मालक आणि शेतकरी यांच्यात ठोस निर्णय होणे आवश्यक असल्याचे शेतकऱ्यांनी सांगितले.
शेतकऱ्यांच्या मते, गुळाच्या विक्रीतून मिळणाऱ्या उत्पन्नाचा योग्य वाटा ऊस उत्पादकाला मिळाल्यास ऊस शेती करणाऱ्या शेतकऱ्यांना मोठा दिलासा मिळू शकतो. त्यामुळे केवळ चर्चेपुरता विषय न ठेवता लवकरात लवकर उसाचा दर निश्चित करण्यासाठी गुऱ्हाळ चालक-मालकांनी पुढाकार घ्यावा, अशी अपेक्षा व्यक्त करण्यात आली.
गुऱ्हाळ चालकांनी शासन व साखर कारखान्यांसमोर आदर्श निर्माण करावा
“आपण लवकरात लवकर उसाचा दर ठरवून शेतकरी बांधवांच्या कल्याणाचा मार्ग शासन आणि साखर कारखान्यांना दाखवावा. आपल्या माध्यमातून एक चांगला आणि आदर्श निर्णय झाला, तर तो शेतकऱ्यांसाठी दीपस्तंभ ठरेल,” अशी भावना यावेळी व्यक्त करण्यात आली.
ऊस उत्पादक शेतकरी, गुऱ्हाळ चालक-मालक आणि साखर उद्योग यांच्यात समन्वयातून ऊस दराचा प्रश्न सोडविण्याची गरज असल्याचेही सभेत अधोरेखित करण्यात आले.
“संघर्ष शेतकऱ्यांच्या हक्कासाठी, कोणाच्या विरोधात नाही”
गुऱ्हाळ चालक-मालकांच्या अडचणींची जाणीव शेतकऱ्यांना असून, हा संघर्ष कोणत्याही व्यक्ती किंवा घटकाच्या विरोधात नसून ऊस उत्पादक शेतकऱ्याला त्याच्या उत्पादनाचा योग्य मोबदला मिळावा, या मागणीसाठी असल्याचे शेतकऱ्यांच्या वतीने स्पष्ट करण्यात आले.
मांडवगण फराटा व पंचक्रोशीतील शेतकऱ्यांनी ऊस दराच्या प्रश्नावर एकजूट दाखवत बाजारभावाशी निगडित आणि पारदर्शक ऊस दर निश्चित करण्याची मागणी केली आहे.
— आपले नम्र,
ऊस उत्पादक शेतकरी, महाराष्ट्र राज्य
तथा शेतकरी कृती समिती, मांडवगण फराटा व पंचक्रोशी, ता. शिरूर, जि. पुणे
