केडगाव-चौफुला : विकास साळुंके
दौंड तालुक्यातील केडगाव-चौफुला येथील बोरमलनाथ मंदिर परिसरात ‘श्री छत्रपती शिवाजी महाराज स्व-समाधान शिबिर व महसूल दिन’ कार्यक्रम उत्साहपूर्ण वातावरणात पार पडला. नागरिकांना महसूल विभागाशी संबंधित विविध सेवा, दाखले, अर्जप्रक्रिया, तक्रार निवारण तसेच शासनाच्या विविध लोककल्याणकारी योजनांची माहिती व मार्गदर्शन एकाच ठिकाणी उपलब्ध करून देण्याच्या उद्देशाने या शिबिराचे आयोजन करण्यात आले होते. या उपक्रमाला परिसरातील नागरिकांनी मोठ्या संख्येने उपस्थित राहून उत्स्फूर्त प्रतिसाद दिला.
प्रांताधिकारी रेवनात लबडे व तहसीलदार अरुण शेलार यांच्या मार्गदर्शनाखाली आयोजित करण्यात आलेल्या या शिबिराच्या अध्यक्षस्थानी दौंड तालुक्याचे आमदार राहुल कुल होते. यावेळी आमदार राहुल कुल यांनी उपस्थित नागरिकांशी संवाद साधत शासनाच्या विविध लोकाभिमुख योजना, महसूल विभागाच्या सेवा आणि उपलब्ध सुविधांचा नागरिकांनी जास्तीत जास्त लाभ घ्यावा, असे आवाहन केले.
महसूल विभागाच्या सेवा नागरिकांपर्यंत अधिक सुलभतेने आणि तत्परतेने पोहोचविण्यासाठी अशा प्रकारची शिबिरे अत्यंत उपयुक्त ठरत असल्याचे आमदार राहुल कुल यांनी यावेळी सांगितले. ग्रामीण भागातील नागरिकांना अनेकदा विविध कामांसाठी तालुक्याच्या ठिकाणी जावे लागते. त्यामुळे त्यांच्या अडचणी स्थानिक पातळीवर समजून घेऊन त्यांचे निराकरण करण्यासाठी प्रशासनाने अशा उपक्रमांना प्राधान्य देणे गरजेचे असल्याचे त्यांनी नमूद केले.
शिबिरादरम्यान महसूल विभागाच्या विविध सेवांबाबत नागरिकांना सविस्तर मार्गदर्शन करण्यात आले. उत्पन्न, रहिवासी, जात आदी दाखल्यांसाठी अर्ज, जमीनविषयक प्रश्न, महसुली प्रकरणे, विविध नोंदी, प्रलंबित कामे तसेच तक्रारींचे निवारण याबाबत संबंधित अधिकारी व कर्मचाऱ्यांनी नागरिकांना आवश्यक माहिती दिली. अनेक नागरिकांचे अर्ज जागेवरच स्वीकारण्यात आले, तर विविध प्रकरणांबाबत आवश्यक कागदपत्रे, कार्यपद्धती आणि पुढील कार्यवाही यासंदर्भात मार्गदर्शन करण्यात आले.
या उपक्रमामुळे नागरिकांना शासनाच्या विविध योजना व महसूल सेवांची माहिती थेट प्रशासनाच्या अधिकाऱ्यांकडून मिळाली. आपल्या समस्या मांडण्यासाठी स्वतंत्रपणे कार्यालयीन फेऱ्या मारण्याची गरज भासू नये, या उद्देशाने आयोजित करण्यात आलेल्या शिबिरामुळे नागरिकांना दिलासा मिळाल्याचे चित्र पाहायला मिळाले. प्रशासनाने नागरिकांच्या दारात जाऊन सेवा देण्याचा घेतलेला हा उपक्रम कौतुकास्पद असल्याची भावना उपस्थित नागरिकांनी व्यक्त केली.
यावेळी महसूल विभागातील अधिकारी व कर्मचारी, ग्रामपंचायत पदाधिकारी, विविध शासकीय विभागांचे प्रतिनिधी तसेच परिसरातील मान्यवर आणि मोठ्या संख्येने नागरिक उपस्थित होते. शिबिराचे नियोजन, समन्वय आणि आयोजन महसूल विभागाच्या वतीने करण्यात आले होते. प्रशासन व नागरिक यांच्यातील संवाद अधिक दृढ करण्यासोबतच महसुली सेवा तातडीने उपलब्ध करून देण्याच्या दृष्टीने हे शिबिर महत्त्वपूर्ण ठरले.
नागरिकांच्या उत्स्फूर्त सहभागामुळे आणि प्रशासनाच्या प्रभावी नियोजनामुळे ‘श्री छत्रपती शिवाजी महाराज स्व-समाधान शिबिर व महसूल दिन’ उपक्रम यशस्वी ठरला. भविष्यातही अशा प्रकारची शिबिरे नियमितपणे आयोजित करून नागरिकांच्या समस्या स्थानिक पातळीवर सोडविण्यात याव्यात, अशी अपेक्षा यावेळी नागरिकांनी व्यक्त केली.
