समाजासाठी पुढे आले युवा उद्योजक! स्वच्छतेपासून गोसेवेपर्यंत स्वप्निल फडके यांचा सामाजिक योगदानाचा आदर्श
प्रतिनिधी – योगेश राऊत
कानगाव : समाजाप्रती असलेली बांधिलकी केवळ भाषणातून नव्हे, तर प्रत्यक्ष कृतीतूनही व्यक्त करता येते, याचा प्रत्यय युवा उद्योजक स्वप्निल संभाजी फडके यांनी आपल्या कामातून दिला आहे. व्यवसायाच्या व्यापातून वेळ काढत त्यांनी गणेशवाडीतील सार्वजनिक रस्त्याच्या स्वच्छतेसाठी पुढाकार घेतला, तर केडगाव-चौफुला येथील बोरमलनाथ देवस्थानच्या गोशाळेतील गाईंसाठी हिरव्या चाऱ्याची व्यवस्था करून सामाजिक संवेदनशीलतेचा परिचय दिला.
गणेशवाडी परिसरातील रस्त्याच्या कडेला काटेरी झुडपे, कचरा आणि घाणीचे साम्राज्य निर्माण झाले होते. त्यामुळे नागरिकांना अस्वच्छतेचा सामना करावा लागत होता. ही परिस्थिती बदलण्यासाठी केवळ तक्रारी न करता स्वप्निल फडके यांनी स्वतः पुढाकार घेत परिसर स्वच्छ करण्यासाठी प्रयत्न केले. त्यांच्या या कृतीतून सार्वजनिक स्वच्छता ही प्रत्येकाची सामूहिक जबाबदारी असल्याचा संदेश अधोरेखित झाला.
दुसरीकडे, माणसांप्रमाणेच मुक्या जनावरांच्या गरजांकडेही संवेदनशीलतेने पाहण्याची भूमिका त्यांनी घेतली. केडगाव-चौफुला येथील बोरमलनाथ देवस्थानच्या गोशाळेतील गाईंसाठी हिरव्या चाऱ्याची मदत उपलब्ध करून देत त्यांनी गोसेवेचेही कार्य केले.
विशेष म्हणजे, हे दोन्ही उपक्रम कोणत्याही प्रसिद्धीच्या अपेक्षेपेक्षा सामाजिक जाणिवेतून राबविल्याचे त्यांच्या कार्यातून दिसून येते. सोलर लिप एनर्जीच्या माध्यमातून उद्योजकीय क्षेत्रात कार्यरत असतानाच समाजातील छोट्या-मोठ्या समस्यांकडे लक्ष देण्याची त्यांची भूमिका निश्चितच कौतुकास्पद आहे.
आज अनेकदा सामाजिक बदलाची अपेक्षा प्रशासनाकडून केली जाते; मात्र एखाद्या जागरूक नागरिकाने पुढाकार घेतल्यास सकारात्मक बदलाची सुरुवात स्थानिक पातळीवरही होऊ शकते, हे फडके यांच्या उपक्रमांनी दाखवून दिले आहे.
त्यांच्या या कार्याचे गणेशवाडी ग्रामस्थांनी स्वागत करून आभार व्यक्त केले. स्वच्छतेची जाणीव आणि पशुप्रेमाची भावना कृतीतून जपणाऱ्या या उपक्रमामुळे परिसरातील तरुणांनाही सामाजिक कार्यासाठी पुढे येण्याची प्रेरणा मिळेल, अशी अपेक्षा व्यक्त होत आहे.
Author: संपादक - रमेश मनोहर बनसोडे
जाहिरात व बातमीसाठी संपर्क -, 9359541560
