रांजणगावमध्ये सुपारीचा थरार; लक्ष्य समजून घेण्यात चूक, निरपराध कामगाराचा गोळी झाडून खून

रांजणगावमध्ये सुपारीचा थरार; लक्ष्य समजून घेण्यात चूक, निरपराध कामगाराचा गोळी झाडून खून

Rjnews 27 मराठी – रमेश बनसोडे 

जागेच्या वादातून खुनाची सुपारी; स्थानिक गुन्हे शाखा व रांजणगाव पोलिसांची संयुक्त कारवाई — पाच आरोपी अटकेत, दोघांचा शोध सुरू

रांजणगाव : रांजणगाव पोलीस ठाण्याच्या हद्दीतील कारेगाव परिसरात कामावर गेलेल्या कामगाराचा डोक्यात गोळी झाडून खून केल्याच्या गंभीर प्रकरणाचा पोलिसांनी छडा लावला आहे. स्थानिक गुन्हे शाखा आणि रांजणगाव पोलीस ठाण्याच्या पथकांनी संयुक्त तपास करत या प्रकरणातील पाच आरोपींना अटक केली आहे. पोलिसांच्या तपासात धक्कादायक बाब समोर आली असून, ज्याचा खून करण्याची सुपारी देण्यात आली होती, त्याऐवजी त्याच्याच कामगाराचा खून झाल्याचे निष्पन्न झाले आहे.

पाण्याच्या प्लांटमध्ये रक्तरंजित घटना

दि. २९ सप्टेंबर २०२६ रोजी कारेगाव येथील साईनगर परिसरात विकास नवले यांच्या इमारतीलगत असलेल्या समूह इंटरप्राईजेस एक्वा रिच या पाण्याच्या प्लांटमध्ये हमजा उस्मान शेख (वय ३९) हे नेहमीप्रमाणे कामावर गेले होते. याचदरम्यान अज्ञात व्यक्तीने त्यांच्या डोक्यात गोळी झाडून त्यांचा खून केला.

या घटनेनंतर परिसरात खळबळ उडाली होती. मृत हमजा शेख यांच्या पत्नी अभिताबी हमजा शेख (वय ३७) यांनी दिलेल्या फिर्यादीवरून रांजणगाव पोलीस ठाण्यात गुन्हा दाखल करण्यात आला.

सीसीटीव्ही आणि तांत्रिक तपासातून आरोपींपर्यंत पोहोचले पोलिस

घटनेचे गांभीर्य लक्षात घेऊन वरिष्ठ पोलीस अधिकाऱ्यांनी हा गुन्हा तातडीने उघडकीस आणण्याच्या सूचना दिल्या. त्यानुसार स्थानिक गुन्हे शाखा आणि रांजणगाव पोलीस ठाण्याची स्वतंत्र पथके तयार करून समांतर तपास सुरू करण्यात आला.

घटनास्थळ परिसरातील तसेच ये-जा करणाऱ्या मार्गांवरील सीसीटीव्ही फुटेज तपासण्यात आले. त्यासोबतच तांत्रिक तपासाच्या आधारे संशयितांचा माग काढण्यात आला. अखेर पोलिसांनी सार्थक संदेश कोहकडे (वय २४, रा. कारेगाव), तुषार अजय तोडकर (वय २६, रा. पेठ, आंबेगाव), संतोष मधुकर मांजरे (वय ३७, रा. मांजरे वस्ती, खेड), विठ्ठल नवनाथ पितळे (वय २७, रा. कोरेगाव, खेड) आणि योगेश विलास इडोळे (वय २८, रा. शुक्रवार पेठ, वाशिम) यांना ताब्यात घेतले.

जागेच्या वादातून खुनाची सुपारी

पोलिसांच्या चौकशीत या प्रकरणामागील धक्कादायक कारण समोर आल्याचे सांगण्यात आले आहे. तपासानुसार सार्थक संदेश कोहकडे याचा विकास नवले यांच्यासोबत जागेच्या कारणावरून वाद होता. या वादातून सार्थक याने विकास नवले यांचा खून करण्यासाठी तुषार तोडकर याला कथितरित्या सुपारी दिली.

तुषार तोडकर याने पुढे पिंपरी-चिंचवड परिसरातील सराईत व तडीपार आरोपी संतोष मांजरे याच्याशी संपर्क साधल्याचे तपासात निष्पन्न झाले आहे. त्यानंतर संतोष मांजरे व त्याच्या साथीदारांनी विकास नवले यांचा पाण्याच्या प्लांटमध्ये खून करण्याचा कट रचल्याचे पोलिसांनी सांगितले.

मात्र लक्ष्य चुकले अन् कामगार ठरला बळी

या कटाची अंमलबजावणी करताना पवन सुरेश हुंडारे आणि पृथ्वी ऊर्फ भैय्या दत्तू जाधव यांनी विकास नवले समजून त्यांचा कामगार हमजा उस्मान शेख यांच्या डोक्यात गोळी झाडल्याचे तपासात निष्पन्न झाल्याचे पोलिसांनी सांगितले आहे. या घटनेत हमजा शेख यांचा मृत्यू झाला.

त्यामुळे एका व्यक्तीला लक्ष्य करून आखण्यात आलेल्या कथित कटात निष्पाप कामगाराचा जीव गेल्याने या प्रकरणाचे गांभीर्य आणखी वाढले आहे.

पाच आरोपी अटकेत; दोघांचा शोध सुरू

या प्रकरणात पोलिसांनी आतापर्यंत पाच आरोपींना अटक केली असून ते सध्या पोलीस कोठडीत आहेत. तर पवन सुरेश हुंडारे आणि पृथ्वी ऊर्फ भैय्या दत्तू जाधव या दोघांचा शोध सुरू असल्याची माहिती पोलिसांनी दिली आहे.

या प्रकरणाचा पुढील तपास रांजणगाव पोलीस ठाण्याचे पोलीस निरीक्षक कुमार कदम करीत आहेत.

वरिष्ठांच्या मार्गदर्शनाखाली तपास पथकाची कामगिरी

ही कारवाई विशेष पोलीस महानिरीक्षक रंजनकुमार शर्मा, कोल्हापूर परिक्षेत्र; पुणे ग्रामीणचे पोलीस अधीक्षक संदीपसिंग गिल; अपर पोलीस अधीक्षक शुभम पवार आणि उपविभागीय पोलीस अधिकारी महादेव शेलार यांच्या मार्गदर्शनाखाली करण्यात आली.

रांजणगाव पोलीस ठाण्याचे सहाय्यक पोलीस निरीक्षक मोरडे, पोलीस उपनिरीक्षक महेश डोंगरे, तसेच स्थानिक गुन्हे शाखा, रांजणगाव आणि खेड पोलीस ठाण्याच्या अधिकारी व अंमलदारांनी तपासात सहभाग घेतला.

सीसीटीव्ही फुटेज, तांत्रिक तपास आणि पोलिसांच्या समन्वित कारवाईमुळे या गंभीर गुन्ह्याचा उलगडा करण्यात पोलिसांना यश आले आहे.

Author: संपादक - रमेश मनोहर बनसोडे

जाहिरात व बातमीसाठी संपर्क -, 9359541560