पत्रकार सेवा संघाच्या इंदापूर तालुका कार्यकारिणीची निवड जाहीर
निलेश गायकवाड यांची तालुकाध्यक्षपदी निवड; पत्रकारांच्या प्रश्नांसाठी संघटितपणे काम करण्याचा निर्धार
प्रतिनिधी – अंकुश भोसले :
इंदापूर, दि. २० सप्टेंबर |
पत्रकार सेवा संघ महाराष्ट्र राज्याच्या वतीने इंदापूर तालुका कार्यकारिणीची निवड जाहीर करण्यात आली आहे. पुणे जिल्हाध्यक्ष बबनराव धायतोंडे यांच्या मार्गदर्शनाखाली जाहीर करण्यात आलेल्या या कार्यकारिणीत निलेश गायकवाड यांची इंदापूर तालुकाध्यक्षपदी निवड करण्यात आली आहे.
नवनिर्वाचित कार्यकारिणीत उपाध्यक्षपदी संजय वायसे, सचिवपदी अभिजीत देशपांडे, खजिनदारपदी संजय शिंदे, तर प्रसिद्धीप्रमुखपदी महेश कळसाईत यांची निवड करण्यात आली आहे.
कार्यकारिणी सदस्य म्हणून दत्तात्रय पारेकर, भीमसेन उबाळे, संतोष तावरे, संतोष कदम, अरुण भोई, प्रविण पिसे, अंकुश भोसले, महेश गडदे, राहुल पांढरमिसे, सीताराम मदने आणि प्रवीण वाघमोडे यांची निवड करण्यात आली आहे.
इंदापूर तालुक्यातील पत्रकारांच्या विविध प्रश्नांना संघटित व्यासपीठ उपलब्ध करून देणे, पत्रकारांच्या हक्कांसाठी आवाज उठविणे तसेच पत्रकारिता क्षेत्राच्या विकासासाठी सामूहिक प्रयत्न करणे, हा नवनिर्वाचित कार्यकारिणीचा प्रमुख निर्धार असल्याचे यावेळी स्पष्ट करण्यात आले.
ग्रामीण भागात काम करणाऱ्या पत्रकारांना विविध पातळ्यांवर अडचणींचा सामना करावा लागतो. पत्रकारांची सुरक्षितता, काम करताना येणाऱ्या अडचणी तसेच बदलत्या माध्यमविश्वातील आव्हाने याबाबत संघटनेच्या माध्यमातून प्रभावीपणे काम करण्याची गरज यावेळी व्यक्त करण्यात आली.
सध्या सोशल मीडिया आणि डिजिटल माध्यमांचा प्रभाव मोठ्या प्रमाणात वाढत असून पत्रकारितेचे स्वरूपही वेगाने बदलत आहे. या पार्श्वभूमीवर तथ्याधारित, जबाबदार आणि समाजहिताला प्राधान्य देणारी पत्रकारिता अधिक प्रभावीपणे पुढे नेण्याची गरज व्यक्त करण्यात आली.
पत्रकाराची खरी ताकद केवळ त्याच्या ओळखपत्रात नसून त्याच्या विश्वासार्ह लेखणीत आणि पत्रकारितेच्या विश्वासार्हतेत असते. कोणत्याही दबावाला, लोभाला किंवा वैयक्तिक हितसंबंधांना बळी न पडता सत्य आणि तथ्यांना प्राधान्य देणारी पत्रकारिता हीच काळाची गरज असल्याचे मत यावेळी व्यक्त करण्यात आले.
नवनिर्वाचित तालुका कार्यकारिणीच्या माध्यमातून इंदापूर तालुक्यातील पत्रकारांना संघटित करून त्यांच्या प्रश्नांवर सकारात्मक आणि प्रभावीपणे काम करण्याचा प्रयत्न केला जाणार आहे. नूतन पदाधिकारी व कार्यकारिणी सदस्यांचे पत्रकारिता क्षेत्रातील विविध स्तरांतून अभिनंदन होत आहे.
Author: संपादक - रमेश मनोहर बनसोडे
जाहिरात व बातमीसाठी संपर्क -, 9359541560
