शिरूरमध्ये घातक हत्यारे घेऊन फिरणाऱ्या दोन तरुणांना अटक; पोलिसांची मध्यरात्री कारवाई
सह्याद्रीचा आवाज करिता – बालाजी कांबळे
कोयता, स्क्रूड्रायव्हर आणि मोटारसायकलसह ५० हजार ४०० रुपयांचा मुद्देमाल जप्त
शिरूर (प्रतिनिधी) : शिरूर शहरात मध्यरात्रीच्या सुमारास घातक हत्यारे घेऊन संशयास्पदरीत्या फिरणाऱ्या दोन तरुणांना शिरूर पोलिसांनी ताब्यात घेतल्याने परिसरात खळबळ उडाली आहे. पोलिसांनी केलेल्या तपासणीत तरुणांकडे लोखंडी कोयता आणि स्क्रूड्रायव्हर आढळून आले. या कारवाईत हत्यारांसह एक मोटारसायकल असा एकूण ५० हजार ४०० रुपये किमतीचा मुद्देमाल पोलिसांनी जप्त केला आहे.
मिळालेल्या माहितीनुसार, गुरुवार (दि. ५ नोव्हेंबर २०२६) रोजी रात्री एक वाजण्याच्या सुमारास शिरूर शहरातील रामलिंग रोड ते नवीन शिरूर नगरपरिषदेकडे जाणाऱ्या रस्त्यालगत हार्द हॉस्पिटलजवळ अंधारात दोन तरुण संशयास्पदरीत्या फिरताना पोलिसांच्या निदर्शनास आले. पोलिसांनी त्यांना थांबवून चौकशी केली असता त्यांच्या उत्तरांमध्ये समाधानकारक माहिती मिळाली नाही. त्यामुळे पोलिसांनी त्यांची तपासणी केली असता त्यांच्याकडे लोखंडी कोयता आणि हिरव्या रंगाची मूठ असलेला स्क्रूड्रायव्हर आढळून आला.
या प्रकरणी राज रेखा आंधारे (वय २१, रा. शेळकेवस्ती, रांजणगाव) आणि सुजर संतोष उघडे (वय १९, रा. मोडकाई वस्ती, रांजणगाव गणपती) या दोघांना पोलिसांनी ताब्यात घेतले आहे. त्यांच्याकडून ३०० रुपये किमतीचा लोखंडी कोयता, १०० रुपये किमतीचा स्क्रूड्रायव्हर आणि ५० हजार रुपये किमतीची हिरो स्प्लेंडर प्लस मोटारसायकल (क्रमांक MH-45-AB-2749) असा एकूण ५० हजार ४०० रुपयांचा मुद्देमाल जप्त करण्यात आला.
याप्रकरणी शिरूर पोलीस स्टेशनमध्ये गुन्हा रजिस्टर क्रमांक १०१४/२०२६ अन्वये संबंधित कायदेशीर तरतुदींनुसार गुन्हा दाखल करण्यात आला आहे. पुढील तपास पोलीस हवालदार मोरे करीत आहेत.
शहरात रात्रीच्या वेळी घातक हत्यारे घेऊन फिरणाऱ्या व्यक्तींवर पोलिसांनी केलेल्या या कारवाईमुळे नागरिकांमध्ये चर्चेला उधाण आले असून, रात्रीच्या गस्तीसह संशयास्पद हालचालींवर पोलिसांनी अधिक लक्ष केंद्रित करण्याची अपेक्षा व्यक्त होत आहे.
Author: संपादक - रमेश मनोहर बनसोडे
जाहिरात व बातमीसाठी संपर्क -, 9359541560
