दौंडच्या सिद्धार्थ नगरमध्ये महावितरणाच्या डिस्ट्रीब्यूशन बॉक्सला भीषण आग
Rjnews27 मराठी – विकास साळुंके
विद्युत साहित्य जळून खाक; सुदैवाने जीवितहानी टळली, महावितरण कर्मचाऱ्यांच्या तत्परतेने मोठा अनर्थ टळला
दौंड : दौंड शहरातील सिद्धार्थ नगर परिसरात महावितरणच्या विद्युत पुरवठा यंत्रणेतील डिस्ट्रीब्यूशन बॉक्सला अचानक भीषण आग लागल्याची घटना घडली. या आगीत डिस्ट्रीब्यूशन बॉक्ससह त्यातील कॉईल, विद्युत तारा तसेच अन्य विद्युत साहित्य जळून खाक झाले असून, विद्युत उपकरणांचे मोठे नुकसान झाले आहे. सुदैवाने या घटनेत कोणतीही जीवितहानी झालेली नाही.
मिळालेल्या माहितीनुसार, सिद्धार्थ नगर परिसरातील महावितरणच्या विद्युत पुरवठा यंत्रणेतील डिस्ट्रीब्यूशन बॉक्समधून अचानक आग लागण्यास सुरुवात झाली. काही वेळातच आगीने रौद्र रूप धारण केल्याने परिसरात एकच खळबळ उडाली. डिस्ट्रीब्यूशन बॉक्समधील विद्युत साहित्याने पेट घेतल्याने मोठ्या प्रमाणात धूर निर्माण झाला.
घटनेची माहिती मिळताच महावितरणच्या संबंधित कर्मचाऱ्यांनी तातडीने घटनास्थळी धाव घेतली. परिस्थितीचे गांभीर्य लक्षात घेऊन आवश्यक खबरदारी घेत आगीवर नियंत्रण मिळविण्यात आले. कर्मचाऱ्यांनी वेळीच केलेल्या उपाययोजनांमुळे आग अधिक पसरली नाही आणि संभाव्य मोठा धोका टळला.
या आगीत डिस्ट्रीब्यूशन बॉक्स, कॉईल, विद्युत तारा आणि इतर साहित्याचे नुकसान झाले आहे. आगीचे नेमके कारण अद्याप स्पष्ट झाले नसून, विद्युत बिघाडामुळे ही आग लागली असण्याची शक्यता व्यक्त केली जात आहे. घटनेनंतर महावितरणकडून संबंधित विद्युत यंत्रणेची पाहणी करून आवश्यक दुरुस्तीचे काम हाती घेण्यात येणार आहे.
सिद्धार्थ नगर परिसरात विद्युत यंत्रणेला आग लागल्याने काही काळ नागरिकांमध्ये भीतीचे वातावरण निर्माण झाले होते. मात्र, महावितरणच्या कर्मचाऱ्यांनी तत्परतेने घटनास्थळी पोहोचून परिस्थिती नियंत्रणात आणल्याने मोठी दुर्घटना टळली. या घटनेत कोणतीही जीवितहानी न झाल्याने नागरिकांनी सुटकेचा नि:श्वास सोडला.
Author: संपादक - रमेश मनोहर बनसोडे
जाहिरात व बातमीसाठी संपर्क -, 9359541560
