गणेशोत्सवातून पर्यावरण संवर्धनाचा संदेश वृक्षारोपण, पाणी अडवा-पाणी जिरवा अन् कचरा वर्गीकरणावर भर न्यू सांगवीतील श्री श्वेत श्वेतायन सोसायटीतील गणेश मंडळाचा आदर्श उपक्रम

पर्यावरण संवर्धनाचा संदेश देत श्री श्वेत श्वेतायन सोसायटीतील गणेश मंडळाचा आदर्श उपक्रम

Rjnews27 मराठी 

पाणी अडवा-पाणी जिरवा, वृक्षारोपण, कचरा वर्गीकरण अन् प्लास्टिकमुक्त जीवनाचा चित्रकला स्पर्धेतून जनजागृती

पुणे (प्रतिनिधी – मदन लाठी) :

न्यू सांगवी येथील श्री श्वेत श्वेतायन सोसायटीतील गणेश मंडळाने दरवर्षीप्रमाणे यंदाही गणेशोत्सवाच्या माध्यमातून पर्यावरणपूरक आणि समाजोपयोगी उपक्रमांना प्राधान्य दिले आहे. गणेशोत्सव हा केवळ धार्मिक उत्सव न राहता त्यातून पर्यावरण संवर्धन, स्वच्छता आणि जलसंधारणाचा संदेश नागरिकांपर्यंत पोहोचावा, या उद्देशाने मंडळाच्या वतीने विविध जनजागृतीपर उपक्रम राबविण्यात येत आहेत.

याच उपक्रमाचा एक भाग म्हणून लहान मुलांसाठी चित्रकला स्पर्धेचे आयोजन करण्यात आले. या स्पर्धेत सहभागी झालेल्या बालकलाकारांनी आपल्या चित्रांमधून पर्यावरण संवर्धनाचा प्रभावी संदेश मांडला. अधिकाधिक वृक्षारोपण करणे, परिसर स्वच्छ ठेवणे, प्लास्टिकचा कमीतकमी वापर करणे, कापडी पिशव्यांचा वापर वाढविणे, तसेच पाण्याचे संवर्धन करण्याचे महत्त्व मुलांनी चित्रांमधून अधोरेखित केले.

‘पाणी अडवा, पाणी जिरवा’चा संदेश

पाण्याचे महत्त्व लक्षात घेता ‘पाणी अडवा, पाणी जिरवा’ या संकल्पनेवरही जनजागृती करण्यात आली. पावसाचे पाणी अडवून त्याचा योग्य वापर करणे, पाणी जमिनीत मुरविणे आणि भविष्यातील पाणीटंचाई टाळण्यासाठी जलसंधारणाच्या उपाययोजनांची गरज असल्याचा संदेश या उपक्रमातून देण्यात आला.

कचरा वर्गीकरणावरही विशेष भर

घरगुती कचऱ्याचे योग्य पद्धतीने वर्गीकरण करण्याबाबतही नागरिकांमध्ये जागृती करण्यात येत आहे. ओला कचरा आणि सुका कचरा स्वतंत्रपणे जमा करण्याबरोबरच सुका कचरा निळ्या डस्टबिनमध्ये आणि ओला कचरा हिरव्या डस्टबिनमध्ये टाकण्याचे आवाहन करण्यात आले. तसेच इलेक्ट्रॉनिक वस्तूंपासून निर्माण होणारा ई-कचरा इतर कचऱ्यापासून वेगळा करून घंटागाडीच्या माध्यमातून योग्य ठिकाणी देण्याबाबतही जनजागृती करण्यात येत आहे.

प्लास्टिकला पर्याय म्हणून कापडी पिशवीचा संदेश

दैनंदिन जीवनात प्लास्टिकच्या पिशव्यांचा वापर कमी करून त्याऐवजी कापडी पिशव्यांचा वापर करण्याचा संदेशही मंडळाच्या उपक्रमातून देण्यात आला. पर्यावरण रक्षणाची सुरुवात प्रत्येक कुटुंबापासून झाली तर त्याचा व्यापक परिणाम समाजावर होऊ शकतो, हा विचार या उपक्रमामागे असल्याचे दिसून येते.

गणेशोत्सवाच्या माध्यमातून धार्मिक श्रद्धेसोबतच सामाजिक आणि पर्यावरणीय जबाबदारीची जाणीव निर्माण करण्याचा श्री श्वेत श्वेतायन सोसायटीतील गणेश मंडळाचा हा उपक्रम नागरिकांसाठी आणि विशेषतः लहान मुलांसाठी प्रेरणादायी ठरत आहे. बालवयातच पर्यावरण संवर्धनाचे संस्कार रुजल्यास भविष्यात स्वच्छ, हरित आणि पर्यावरणपूरक समाजनिर्मितीस हातभार लागेल, असा संदेश या उपक्रमातून देण्यात आला.

Author: संपादक - रमेश मनोहर बनसोडे

जाहिरात व बातमीसाठी संपर्क -, 9359541560