दौंडमध्ये ‘नवरात्रोत्सव नारीशक्ती महोत्सव २०२६’; महिलांच्या कलागुणांना मिळणार हक्काचे व्यासपीठ
नगराध्यक्ष दुर्गादेवी जगदाळे (पाटील) यांच्या संकल्पनेतून विविध स्पर्धांचे आयोजन; १२ ते १९ ऑक्टोबरदरम्यान रंगणार सांस्कृतिक सोहळा.
योगेश राऊत
दौंड : नवरात्रोत्सवाच्या मंगलमय पर्वाचे औचित्य साधून दौंड शहरातील महिलांच्या कलागुणांना वाव देण्यासाठी आणि त्यांच्या सुप्त गुणांना प्रोत्साहन देण्यासाठी ‘नवरात्रोत्सव नारीशक्ती महोत्सव २०२६’ या विशेष उपक्रमाचे आयोजन करण्यात आले आहे. दौंड नगरपालिकेच्या नगराध्यक्ष कु. दुर्गादेवी जगदाळे (पाटील) यांच्या संकल्पनेतून हा महोत्सव साकारण्यात येत असून, महिलांना आपली कला, कौशल्य आणि सर्जनशीलता प्रदर्शित करण्यासाठी एक हक्काचे व्यासपीठ उपलब्ध करून देण्याचा या उपक्रमामागील मुख्य उद्देश आहे.
नवरात्रोत्सव म्हणजे आदिशक्तीचा जागर आणि स्त्रीशक्तीचा सन्मान. याच भावनेतून आयोजित करण्यात आलेल्या या महोत्सवात महिलांसाठी विविध सांस्कृतिक, कलात्मक आणि पाककला विषयक स्पर्धांचे आयोजन करण्यात आले आहे. या उपक्रमाच्या माध्यमातून महिलांमधील कलागुणांना प्रोत्साहन मिळण्याबरोबरच त्यांच्यातील आत्मविश्वास वाढविणे, सर्जनशीलतेला चालना देणे आणि सामाजिक एकोपा वृद्धिंगत करणे अपेक्षित आहे.
या महोत्सवात रांगोळी, पारंपरिक वेशभूषा, उपवासाचे पदार्थ, पाककला, टाकाऊपासून टिकाऊ वस्तू निर्मिती, नृत्य, गायन, नाट्य आणि मेहंदी अशा विविध स्पर्धांचा समावेश करण्यात आला आहे. प्रत्येक स्पर्धेच्या माध्यमातून महिलांना आपले वेगळेपण सिद्ध करण्याची संधी मिळणार आहे. विशेषतः पारंपरिक कला आणि आधुनिक सर्जनशीलतेचा संगम या महोत्सवात अनुभवायला मिळणार आहे.
असे आहे स्पर्धांचे वेळापत्रक
– १२ ऑक्टोबर : रांगोळी स्पर्धा
– १३ ऑक्टोबर : पारंपरिक वेशभूषा स्पर्धा
– १४ ऑक्टोबर : उपवासाचे पदार्थ स्पर्धा
– १५ ऑक्टोबर : पाककला स्पर्धा
– १६ ऑक्टोबर : टाकाऊपासून टिकाऊ वस्तू निर्मिती स्पर्धा
– १७ ऑक्टोबर : नृत्य, गायन व नाट्य स्पर्धा
– १८ ऑक्टोबर : मेहंदी स्पर्धा
– १९ ऑक्टोबर : दांडिया व प्रमाणपत्र वाटप
या स्पर्धांमध्ये प्रथम, द्वितीय आणि तृतीय क्रमांक पटकाविणाऱ्या विजेत्यांना आयोजकांच्या वतीने विशेष आकर्षक भेटवस्तू देऊन गौरविण्यात येणार आहे. त्यामुळे स्पर्धक महिलांमध्ये उत्साहाचे वातावरण निर्माण होण्याची अपेक्षा आहे.
या महोत्सवात केवळ दौंड नगरपालिकेच्या हद्दीतील महिलांनाच सहभागी होता येणार असून, स्पर्धांसाठी कोणतेही प्रवेश शुल्क आकारले जाणार नाही. इच्छुक महिलांनी २९ सप्टेंबर ते ९ ऑक्टोबर २०२६ या कालावधीत आपली नावनोंदणी करणे आवश्यक आहे. स्पर्धांचे निश्चित ठिकाण आणि इतर आवश्यक तपशील लवकरच जाहीर करण्यात येणार असल्याची माहिती आयोजकांनी दिली आहे.
महिलांच्या दैनंदिन जबाबदाऱ्यांच्या पलीकडे जाऊन त्यांच्यातील कलागुणांना संधी मिळावी, त्यांच्या कौशल्याची दखल घेतली जावी आणि त्यांना स्वतःची ओळख निर्माण करण्यासाठी प्रोत्साहन मिळावे, या उद्देशाने हा महोत्सव आयोजित करण्यात आला आहे. नवरात्रोत्सवाच्या निमित्ताने आयोजित करण्यात आलेला हा उपक्रम दौंड शहरातील महिलांसाठी आनंद, उत्साह आणि कलाविष्काराची पर्वणी ठरणार आहे.
महिलांच्या उत्स्फूर्त सहभागातून हा महोत्सव यशस्वी होईल, असा विश्वास नगराध्यक्ष दुर्गादेवी जगदाळे (पाटील) यांनी व्यक्त केला आहे.
Author: संपादक - रमेश मनोहर बनसोडे
जाहिरात व बातमीसाठी संपर्क -, 9359541560
