पहाटेच्या काळोखात मृत्यूशी झुंज; नातवाच्या सतर्कतेमुळे वृद्ध महिलेचा जीव वाचला
शिरूर, रमेश बनसोडे
पुणे जिल्ह्यातील शिरूर तालुक्यातील इनामगाव येथील नलगे मळा परिसरात शुक्रवारी पहाटे घडलेल्या एका थरारक घटनेने संपूर्ण गाव हादरून गेले आहे. घराच्या पडवीत शांत झोपलेल्या ६५ वर्षीय वृद्ध महिलेवर बिबट्याने अचानक हल्ला केल्याने परिसरात भीतीचे वातावरण निर्माण झाले. मात्र महिलेच्या धाडसामुळे आणि नातवाच्या प्रसंगावधानामुळे मोठी दुर्घटना टळली.
इनामगावातील नलगे मळा हा मुख्य गावापासून सुमारे तीन ते चार किलोमीटर अंतरावर आहे. परिसरात विखुरलेली काही घरे असून जवळपास अर्धा किलोमीटर अंतरावर प्राथमिक शाळा आहे. गुरुवारी रात्री तांत्रिक बिघाडामुळे वीजपुरवठा खंडित झाला होता. उकाड्यामुळे अनेक ग्रामस्थ घराबाहेर अंगणात, पडवीत किंवा टेरेसवर झोपले होते. त्याचप्रमाणे पुष्पा रंगनाथ नलगे या आपल्या नातवासह घराच्या पडवीत झोपल्या होत्या.
पहाटे साधारण तीन वाजून पंधरा ते वीस मिनिटांच्या दरम्यान बिबट्याने दबक्या पावलांनी घराजवळ प्रवेश केला. अंधाराचा फायदा घेत त्याने झोपलेल्या महिलेजवळ येऊन तिच्यावर झडप घालण्याचा प्रयत्न केला. अंगावर अंथरूण असल्यामुळे बिबट्याला थेट गंभीर दुखापत करता आली नाही. मात्र त्याच्या नख्यांचे ओरखडे महिलेच्या कमरेवर बसले आणि त्या जखमी झाल्या.
या घटनेची माहिती देताना पुष्पा नलगे यांनी सांगितले की, झोपेत असतानाच कोणीतरी अंगाला स्पर्श करत असल्याची जाणीव झाली. काही क्षणांतच बिबट्याने हल्ला केल्याचे लक्षात येताच त्यांनी जीवाच्या आकांताने आरडाओरडा सुरू केला. त्याचवेळी काही क्षणांपूर्वी पाणी पिण्यासाठी उठलेल्या नातवानेही आजीचा आवाज ऐकून मोठ्याने “बिबट्या आला” अशी आरोळी दिली.
नातवाच्या आवाजाने आणि महिलेच्या ओरडण्याने घरातील तसेच आसपासचे लोक तात्काळ धावत बाहेर आले. सुमारे तीन ते चार मिनिटे चाललेल्या या थरारक प्रसंगात बिबट्या काही अंतरावर उभा राहून लोकांकडे पाहत होता. मात्र ग्रामस्थांची गर्दी वाढताच त्याने घटनास्थळावरून धूम ठोकली.
घटनेनंतर जखमी झालेल्या पुष्पा नलगे यांच्यावर मांडवगण फराटा येथील रुग्णालयात उपचार करण्यात आले. उपचारानंतर त्यांची प्रकृती स्थिर असून त्या सुखरूपपणे घरी परतल्या आहेत. त्यामुळे कुटुंबीयांनी सुटकेचा निःश्वास सोडला आहे.
या घटनेनंतर वन विभागाने तातडीने दखल घेत नलगे मळा परिसरात पिंजरा लावला आहे. तसेच परिसरावर लक्ष ठेवून गस्त वाढविण्यात आली असून बिबट्याच्या हालचालींवर बारकाईने नजर ठेवली जात आहे. वन विभागाच्या या कारवाईमुळे ग्रामस्थांमध्ये काही प्रमाणात दिलासा निर्माण झाला आहे.
दरम्यान, ग्रामस्थांनी या घटनेबाबत तीव्र नाराजी व्यक्त केली आहे. परिसरात वारंवार होणाऱ्या वीजपुरवठा खंडित होण्याच्या प्रकारामुळे रात्री मोठ्या प्रमाणात अंधाराचे साम्राज्य पसरते. अंधाराचा फायदा घेत वन्यप्राणी वस्तीत शिरकाव करत असल्याचा आरोप नागरिकांनी केला आहे. भविष्यात अशा घटना टाळण्यासाठी वीजपुरवठा सुरळीत ठेवावा, तसेच नागरिकांच्या सुरक्षेसाठी कायमस्वरूपी उपाययोजना कराव्यात, अशी मागणी करण्यात येत आहे.
पहाटेच्या शांततेला चिरत आलेल्या या बिबट्याच्या हल्ल्याने नलगे मळा परिसरातील नागरिकांच्या मनात भीतीचे सावट निर्माण झाले असले, तरी एका वृद्ध महिलेचे धाडस, नातवाचे प्रसंगावधान आणि वेळेवर मिळालेली मदत यामुळे एक मोठी दुर्घटना टळली. आज पुष्पा नलगे सुखरूप घरी परतल्या असून संपूर्ण परिसर त्यांच्या प्रकृतीत सुधारणा झाल्याने समाधान व्यक्त करत आहे.
