पुणे जिल्ह्याचे सुपुत्र आकाश वडघुले यांना ‘महर्षी दादासाहेब फाळके पुरस्कार’ प्रदान

पुणे जिल्ह्याचे सुपुत्र आकाश वडघुले यांना ‘महर्षी दादासाहेब फाळके पुरस्कार’ प्रदान

प्रभावी निवेदनशैली, शिवचरित्रावरील व्याख्यानातून युवकांना प्रेरणा; पिंपरी-चिंचवडमध्ये दिमाखदार सोहळा

अल्लाउद्दीन अलवी | प्रतिनिधी | ता. २५

पिंपरी-चिंचवड : आपल्या दमदार आवाजाने, प्रभावी वक्तृत्वाने आणि प्रसंगानुरूप निवेदनाच्या वैशिष्ट्यपूर्ण शैलीने पुणे जिल्ह्यात स्वतंत्र ओळख निर्माण करणारे अष्टपैलू निवेदक व शिवव्याख्याते आकाश उत्तम वडघुले यांना प्रतिष्ठित ‘महर्षी दादासाहेब फाळके पुरस्कार’ प्रदान करण्यात आला. पिंपरी-चिंचवड येथील आचार्य अत्रे नाट्यगृहात शनिवारी झालेल्या दिमाखदार पुरस्कार सोहळ्यात चित्रपट व सामाजिक क्षेत्रातील मान्यवरांच्या हस्ते वडघुले यांचा गौरव करण्यात आला.

स्वराज्य फिल्म प्रोडक्शन व सोशल फाउंडेशन यांच्या वतीने या पुरस्कार सोहळ्याचे आयोजन करण्यात आले होते. या कार्यक्रमाचे नेटके नियोजन स्वराज्य फिल्म प्रोडक्शनचे सीईओ गिरीश शिवदास राजुरकर यांनी केले.

आकाश वडघुले यांनी गेल्या काही वर्षांत निवेदक आणि शिवव्याख्याते म्हणून आपल्या कार्याचा ठसा उमटवला आहे. पुणे जिल्ह्यातील विविध राजकीय जाहीर सभा, सामाजिक परिषदा, शैक्षणिक कार्यक्रम तसेच सांस्कृतिक व्यासपीठांवर त्यांनी आपल्या प्रभावी निवेदनातून कार्यक्रमांना वेगळी उंची मिळवून दिली आहे. त्यांच्या आवाजातील दमदारपणा, भाषेवरील प्रभुत्व, अचूक शब्दफेक आणि प्रसंगावधान यामुळे निवेदन क्षेत्रात त्यांनी आपले वेगळे स्थान निर्माण केले आहे.

विशेषतः छत्रपती शिवाजी महाराजांच्या चरित्रावर आधारित त्यांच्या ओजस्वी व्याख्यानांना युवकांकडून उत्स्फूर्त प्रतिसाद मिळतो. पहाडी आवाज, प्रभावी मांडणी आणि इतिहासातील प्रसंग जिवंत करण्याची हातोटी यामुळे त्यांच्या व्याख्यानांमधून हजारो तरुणांना प्रेरणा मिळत असल्याचे मानले जाते. शिवचरित्राच्या माध्यमातून शौर्य, स्वाभिमान, सामाजिक बांधिलकी आणि राष्ट्रप्रेमाची मूल्ये तरुणांपर्यंत पोहोचविण्याचे काम ते सातत्याने करत आहेत.

निवेदन क्षेत्राबरोबरच सामाजिक जाणिवेतून काम करण्यासाठीही आकाश वडघुले यांची ओळख आहे. सामाजिक न्याय, मानवी मूल्ये आणि समाजातील सकारात्मक विचारांना प्रोत्साहन देण्याच्या त्यांच्या भूमिकेचे विविध स्तरांतून कौतुक केले जाते. व्यासपीठावर कोणत्याही परिस्थितीत प्रसंगावधान राखून प्रभावीपणे सूत्रसंचालन करण्याची त्यांची क्षमता ही त्यांच्या कार्याची विशेष जमेची बाजू मानली जाते.

या पुरस्कार सोहळ्यास प्रसिद्ध चित्रपट निर्माते बाळासाहेब बांगर, ज्येष्ठ अभिनेत्री मृणाल कुलकर्णी, दिग्दर्शक रमेश चौधरी यांच्यासह चित्रपट, कला, सामाजिक आणि सांस्कृतिक क्षेत्रातील अनेक मान्यवर उपस्थित होते.

आकाश वडघुले यांना मिळालेल्या या सन्मानामुळे त्यांच्या कार्याची दखल व्यापक स्तरावर घेतली गेली असून, पुणे जिल्ह्याच्या सांस्कृतिक आणि कलाक्षेत्राच्या शिरपेचात आणखी एक मानाचा तुरा खोवला गेला आहे. त्यांच्या या यशाबद्दल राजकीय, सामाजिक, शैक्षणिक आणि सांस्कृतिक क्षेत्रातील मान्यवरांकडून अभिनंदनाचा वर्षाव होत आहे.

“निवेदन ही केवळ शब्दांची मांडणी नसून विचार आणि भावना समाजापर्यंत पोहोचविण्याचे प्रभावी माध्यम आहे,” या भूमिकेतून आकाश वडघुले यांची सुरू असलेली वाटचाल आगामी काळातही अधिक व्यापक होईल, अशी अपेक्षा व्यक्त होत आहे.

Author: संपादक - रमेश मनोहर बनसोडे

जाहिरात व बातमीसाठी संपर्क -, 9359541560