Rjnews27marathi – रमेश बनसोडे
पुणे जिल्ह्यातील शिरूर तालुक्यातील बाभुळसर बु. येथे कौटुंबिक वादातून एक धक्कादायक खूनाची घटना उघडकीस आली आहे. घरातील आणि शेतीतील कामांवरून झालेल्या वादातून संतप्त झालेल्या पुतण्याने आपल्या आजोबांच्या वयाच्या वृद्ध नातलगावर लोखंडी गजाने हल्ला करून त्यांचा खून केल्याची गंभीर घटना घडली आहे.
मिळालेल्या माहितीनुसार, दिनांक १५ जून २०२६ रोजी सकाळी सुमारे ८ वाजण्याच्या सुमारास ही घटना घडली. बाभुळसर बु. गावातील राहत्या घरासमोरच्या अंगणात हा प्रकार घडला. दशरथ यशवंत राऊत (वय ८४ वर्षे) हे आपल्या घरी असताना त्यांचा नातू असलेल्या सोमनाथ बाळासो राऊत (वय २६ वर्षे) याच्यासोबत घरातील आणि शेतातील कामांच्या कारणावरून वाद झाला.
वाद चिघळल्याने सोमनाथ राऊत याने रागाच्या भरात हातातील लोखंडी गजाने दशरथ राऊत यांच्या डोक्यावर आणि पाठीवर जोरदार वार केले. या गंभीर मारहाणीत दशरथ राऊत यांचा जागीच मृत्यू झाला. घटनेनंतर परिसरात मोठी खळबळ उडाली असून ग्रामस्थांमध्ये भीतीचे वातावरण निर्माण झाले आहे.
या प्रकरणी मृताचे नातेवाईक दुर्योधन दशरथ राऊत (वय ५६ वर्षे, व्यवसाय शेती, रा. बाभुळसर बु.) यांनी शिरूर पोलीस स्टेशन येथे तक्रार दाखल केली आहे. त्यानुसार पोलिसांनी गुन्हा रजिस्टर क्रमांक ५६२/२०२६ नोंदवून पुढील तपास सुरू केला आहे.
पोलिसांनी घटनास्थळावरून लोखंडी गज जप्त केला असून आरोपीविरुद्ध खुनाचा गुन्हा दाखल करण्यात आला आहे. सध्या आरोपीला ताब्यात घेण्याची प्रक्रिया सुरू असून तपास अधिकाऱ्यांकडून पुढील चौकशी केली जात आहे.
या घटनेमुळे शिरूर तालुक्यात एकच खळबळ उडाली असून, कौटुंबिक वादाचे टोक गाठल्याने एका वृद्धाचा जीव गेला असल्याने परिसरात हळहळ व्यक्त होत आहे.
