प्रतिनिधी – विजय कांबळे
नागरगाव : वैद्यकीय क्षेत्रातील उत्कृष्ट कार्यासोबतच सामाजिक बांधिलकी जपत गरजू रुग्णांना मदतीचा हात देणाऱ्या शिरूर नगरपरिषदेच्या नगरसेविका तथा विद्युत व पाणीपुरवठा सभापती डॉ. सुनिता संतोष पोटे यांना ‘शिवशाही महारत्न पुरस्कार’ देऊन गौरविण्यात आले. शिवशाही न्यूज नेटवर्कच्या चौथ्या वर्धापन दिनानिमित्त पंढरपूर येथील श्रीराम मंगल कार्यालयात आयोजित करण्यात आलेल्या दिमाखदार सोहळ्यात त्यांच्या वैद्यकीय, सामाजिक आणि मानवतावादी कार्याची विशेष दखल घेण्यात आली.
राज्यभरातील विविध क्षेत्रांत उल्लेखनीय, प्रेरणादायी आणि समाजोपयोगी कार्य करणाऱ्या गुणवंतांचा या सोहळ्यात सन्मान करण्यात आला. त्यामध्ये डॉ. सुनिता पोटे यांच्या कार्याचा विशेष गौरव करण्यात आला. त्यांच्या वैद्यकीय सेवेबरोबरच गरजू व आर्थिकदृष्ट्या दुर्बल घटकांना अल्पदरात तसेच अनेक वेळा मोफत उपचार देण्याच्या कार्याची उपस्थित मान्यवरांनी प्रशंसा केली.
या कार्यक्रमाच्या अध्यक्षस्थानी राष्ट्रपती पदक विजेत्या ज्येष्ठ भारुड सम्राज्ञी चंदाताई तिवारी होत्या. कार्यक्रमाचे उद्घाटन पंढरपूर-मंगळवेढा मतदारसंघाचे आमदार समाधान आवताडे यांच्या हस्ते झाले.
मान्यवरांच्या उपस्थितीत पुरस्काराचे वितरण
या पुरस्कार सोहळ्यास उपमुख्यमंत्री एकनाथ शिंदे यांचे विशेष कार्यकारी अधिकारी मंगेश चिवटे, डिजिटल मीडिया संपादक पत्रकार संघाचे प्रदेशाध्यक्ष सतीश सावंत, पंढरपूरच्या नगराध्यक्ष डॉ. प्रणिता भालके, माजी जिल्हा परिषद सदस्या ऋतुजाताई मोरे, मनसे नेते दिलीप धोत्रे, उपविभागीय पोलीस अधिकारी प्रशांत डगळे, शिवसेना सोलापूर लोकसभा संपर्कप्रमुख महेश साठे, आम्ही शिरूरकर फाउंडेशनचे अध्यक्ष रवींद्र बापू सानप, मनसे पुणे जिल्हा उपाध्यक्ष महेबूब भाई सय्यद, शिरूर प्रवासी संघाचे अध्यक्ष अनिल बांडे, उद्योजक राजेंद्र खेतमाळीस, गोपी शेठ पठारे, शिवशाही न्यूज नेटवर्कचे मुख्य संपादक सचिन कुलकर्णी, कार्यकारी संपादक मनिषा कुलकर्णी यांच्यासह राजकीय, सामाजिक, प्रशासकीय आणि माध्यम क्षेत्रातील अनेक मान्यवर उपस्थित होते.
रस्त्यावर प्रसूती करून मानवतेचे दर्शन
डॉ. सुनिता पोटे यांच्या कार्याची चर्चा विशेषत्वाने होत आहे ती त्यांच्या धाडसी आणि संवेदनशील कृतीमुळे. काही दिवसांपूर्वी प्रसूतीवेदनेने कासावीस झालेल्या एका अत्यंत गरीब महिलेच्या मदतीला त्या तत्काळ धावून गेल्या. परिस्थिती अत्यंत बिकट असताना आणि आवश्यक वैद्यकीय सुविधा उपलब्ध नसतानाही त्यांनी प्रसंगावधान, वैद्यकीय कौशल्य आणि धैर्याच्या जोरावर रस्त्यावरच त्या महिलेची यशस्वी प्रसूती केली.
या घटनेने त्यांच्या वैद्यकीय ज्ञानासोबतच रुग्णांविषयी असलेली आपुलकी आणि माणुसकी अधोरेखित झाली. संकटाच्या क्षणी डॉक्टर म्हणून आपली जबाबदारी ओळखत त्यांनी केलेल्या या कार्याचे विविध स्तरांतून कौतुक करण्यात आले. त्यामुळेच ‘डॉक्टर’ या व्यावसायिक ओळखीपलीकडे जाऊन समाजासाठी धावून जाणाऱ्या संवेदनशील व्यक्तिमत्त्वाची ओळख त्यांना मिळाली आहे.
वैद्यकीय सेवेला समाजसेवेची जोड
आजच्या काळात आरोग्यसेवा दिवसेंदिवस महाग होत असताना सर्वसामान्य आणि आर्थिकदृष्ट्या दुर्बल नागरिकांसाठी परवडणारी वैद्यकीय सेवा उपलब्ध करून देणे ही मोठी गरज आहे. या पार्श्वभूमीवर डॉ. सुनिता पोटे यांनी आपल्या पतीच्या सहकार्याने अनेक रुग्णांना अत्यल्प दरात उपचार दिले असून गरजूंना मोफत आरोग्यसेवा देण्याचा प्रयत्न कायम ठेवला आहे.
वैद्यकीय क्षेत्रातील सेवा करतानाच त्यांनी सामाजिक आणि राजकीय क्षेत्रातही आपली वेगळी ओळख निर्माण केली आहे. शिरूर नगरपरिषदेच्या नगरसेविका म्हणून काम करताना नागरिकांच्या प्रश्नांकडे संवेदनशीलतेने पाहण्याची त्यांची भूमिका कायम राहिली आहे. विद्युत आणि पाणीपुरवठा सभापती म्हणूनही नागरिकांच्या मूलभूत सुविधांशी संबंधित प्रश्न सोडविण्यासाठी त्या सक्रिय असल्याचे त्यांच्या समर्थकांकडून सांगण्यात आले.
महिला नेतृत्वाचे प्रेरणादायी उदाहरण
वैद्यकीय सेवा, समाजकार्य आणि राजकारण या तीनही क्षेत्रांचा समतोल साधत कार्य करणाऱ्या डॉ. सुनिता पोटे या महिलांसाठीही प्रेरणादायी ठरत आहेत. वैद्यकीय ज्ञानाचा उपयोग केवळ स्वतःच्या व्यवसायापुरता मर्यादित न ठेवता समाजातील गरजू घटकांसाठी करण्याची त्यांची भूमिका त्यांच्या कार्याची वेगळी ओळख निर्माण करते.
मोठ्या मताधिक्याने नगरसेविका म्हणून निवडून येत त्यांनी राजकीय क्षेत्रातही आपला प्रभाव निर्माण केला. त्यामुळे वैद्यकीय क्षेत्रातील अनुभव, सामाजिक जाणीव आणि लोकप्रतिनिधी म्हणून असलेली जबाबदारी या तिन्हींचा संगम त्यांच्या कार्यातून दिसून येतो.
मान्यवरांकडून कार्याचे कौतुक
“डॉ. सुनिता पोटे यांनी आपल्या वैद्यकीय ज्ञानाचा उपयोग सर्वसामान्यांच्या हितासाठी केला आहे. त्यामुळे एक महिला डॉक्टर राजकारणात यशस्वी होऊ शकते, हा वस्तुपाठ त्यांनी घालून दिला आहे. पुण्यासारख्या जिल्ह्यातील शिरूर नगरपरिषदेत त्या प्रचंड मतांनी निवडून आल्या, हे त्यांच्या कामाची पावती आहे. त्यामुळे ‘शिवशाही महारत्न’ पुरस्कारासाठी त्या खरोखरच पात्र आहेत,” असे मत मंगेश चिवटे, विशेष कार्यकारी अधिकारी, उपमुख्यमंत्री एकनाथ शिंदे यांनी व्यक्त केले.
“रस्त्यावर यशस्वी प्रसूती करून डॉ. सुनिता पोटे यांनी जनतेविषयी असलेली आपुलकी आणि बांधिलकी यांचे सर्वोच्च उदाहरण घालून दिले आहे. त्यांना ‘शिवशाही महारत्न’ पुरस्कार मिळणे ही त्यांच्या कार्याची पोचपावती आहे. पांडुरंगाच्या नगरीत आणि माझ्या मतदारसंघात हा पुरस्कार त्यांना मिळाला, ही माझ्यासाठी आनंदाची आणि अभिमानाची बाब आहे,” असे गौरवोद्गार आमदार समाधान आवताडे यांनी काढले.
डॉ. सुनिता पोटे यांच्या कार्याचा गौरव करणारा हा पुरस्कार सोहळा त्यांच्या वैद्यकीय सेवेला, सामाजिक बांधिलकीला आणि महिला नेतृत्वाला मिळालेली प्रतिष्ठेची दाद ठरली आहे. त्यांच्या कार्याची दखल घेत मिळालेल्या या सन्मानामुळे शिरूर तालुक्यासह वैद्यकीय आणि सामाजिक क्षेत्रातून त्यांच्यावर अभिनंदनाचा वर्षाव होत आहे
