पुणे–सोलापूर महामार्गावर मोठी कारवाई; 20 लाखांहून अधिक किमतीचा गांजा जप्त, दोघे ताब्यात
यवत पोलिसांची नाकाबंदी दरम्यान छापेमार कारवाई; कारमधून तब्बल 29 किलोहून अधिक गांजाची वाहतूक उघड
यवत प्रतिनिधी :Rjnews 27 मराठी
पुणे–सोलापूर महामार्गावर धायगुडेवाडी परिसरात यवत पोलिसांनी केलेल्या धडक कारवाईत मोठ्या प्रमाणात अंमली पदार्थ जप्त करण्यात आले असून सुमारे 20 लाख रुपयांहून अधिक किमतीचा मुद्देमाल पोलिसांच्या हाती लागला आहे. या प्रकरणी दोन संशयितांना ताब्यात घेण्यात आले असून पुढील तपास सुरू आहे.
पोलिसांकडून मिळालेल्या माहितीनुसार, पुणे–सोलापूर महामार्गावरील धायगुडेवाडी गावाच्या हद्दीत असलेल्या हॉटेल दुर्गा समोर संशयास्पद हालचाली सुरू असल्याची गोपनीय माहिती यवत पोलिसांना प्राप्त झाली होती. या माहितीची खातरजमा करून पोलिसांनी संबंधित परिसरात नाकाबंदी करून वाहने तपासण्यास सुरुवात केली.
दरम्यान, रात्री उशिरा एक पांढऱ्या रंगाची कार संशयास्पदरीत्या जात असताना पोलिसांनी ती अडवून तपासणी केली. वाहनाची झडती घेतली असता त्यामध्ये मोठ्या प्रमाणात गांजाचा साठा आढळून आला. पोलिसांनी तत्काळ कारवाई करत वाहनासह दोघांना ताब्यात घेतले.
या कारवाईत सुमारे 29 किलो 600 ग्रॅम गांजा, अंदाजे 14 लाख 50 हजार रुपये किमतीचा अंमली पदार्थ, तसेच सुमारे 5 लाख 50 हजार रुपये किमतीची मारुती सुझुकी कंपनीची बलेनो कार असा एकूण 20 लाख 30 हजार रुपयांचा मुद्देमाल जप्त करण्यात आला आहे.
ताब्यात घेतलेल्या दोघांकडून गांजाची वाहतूक कुठून केली जात होती व तो कुठे नेण्यात येत होता याबाबत पोलिस अधिक तपास करत आहेत. संबंधित संशयितांना अटक करण्यात आली असून ते सध्या पोलिस कोठडीत आहेत.
ही कारवाई यवत पोलीस स्टेशनच्या पथकाने केली असून पुढील तपास पोलीस अधिकारी करत आहेत. या घटनेमुळे महामार्गावरून होणाऱ्या अंमली पदार्थांच्या वाहतुकीबाबत पुन्हा एकदा गंभीर प्रश्न उपस्थित झाले आहेत.
