सामाजिक सन्मानाची भव्य चळवळ धुळे शहरात!
लोकराजा शाहू महाराजांच्या जयंतीनिमित्त राज्यस्तरीय गौरव सोहळा धुळ्यात उत्साहात पार
शिरूर प्रतिनिधी
— सामाजिक न्यायाचे अध्वर्यू आणि लोकशाही मूल्यांचे शिल्पकार लोकराजा राजश्री छत्रपती शाहू महाराज यांच्या जयंतीच्या निमित्ताने, 29 जून 2025 रोजी वर्ल्ड ह्युमॅनिटी कमिशन यु.एस.ए. तर्फे आयोजित राज्यस्तरीय गौरव पुरस्कार सोहळा अत्यंत भव्यदिव्य वातावरणात ज्येष्ठ नागरिक भवन, संतोषी माता चौक, धुळे येथे संपन्न झाला.
या ऐतिहासिक कार्यक्रमात सामाजिक, शैक्षणिक, सांस्कृतिक, क्रीडा, आरोग्य, कृषी, उद्योग व सैनिक क्षेत्रात अतुलनीय योगदान देणाऱ्या जवळपास 80 मान्यवरांना पुरस्कार देऊन सन्मानित करण्यात आले. “सन्मान हा कार्याचा गौरव असतो, व्यक्तीचा नव्हे”, या विचारांना मूर्त रूप देणारा हा सोहळा राज्यभरातून आलेल्या विविध क्षेत्रातील प्रतिनिधींसाठी प्रेरणादायी ठरला.
शाहू महाराजांच्या विचारांचा जागर
कार्यक्रमाचे प्रमुख वैशिष्ट्य म्हणजे छत्रपती शाहू महाराजांच्या सामाजिक कार्याचा जागर. शैक्षणिक, सामाजिक आणि सांस्कृतिक सुधारणांचा पाया रचणाऱ्या शाहू महाराजांनी आपल्या कार्यकाळात दलित, शोषित, वंचित समाजाला न्याय आणि संधी देण्याचे कार्य केलं. त्याच प्रेरणेतून या पुरस्कारांचे आयोजन करण्यात आले, असे संयोजकांनी सांगितले.
अपर्णा रमेश आफळे यांना ‘राज्यस्तरीय शिक्षिका गौरव पुरस्कार’
कार्यक्रमातील एक विशेष आकर्षण ठरले — सौ. अपर्णा रमेश आफळे यांना प्रदान करण्यात आलेला राज्यस्तरीय शिक्षिका गौरव पुरस्कार. शिक्षण क्षेत्रात त्यांनी दिलेल्या समर्पित योगदानाची ही लक्षणीय दखल होती.
मान्यवरांची मांदियाळी
या कार्यक्रमाला वर्ल्ड ह्युमॅनिटी कमिशनचे नॅशनल ब्रँड अँबेसेडर विजय बंसली यांनी प्रमुख पाहुणे म्हणून उपस्थिती लावली. यासोबतच पालेषा आर्ट्स, कॉमर्स, सायन्स कॉलेजचे प्राचार्य डॉ. प्रभाकर महाले, उपप्राचार्य डॉ. उमेश यशवंतराव गांगुर्डे (क्रांतिवीर नवल भाऊ महाविद्यालय, नवलनगर) आणि आम आदमी पार्टीचे धुळे जिल्हाध्यक्ष हितेंद्र पवार यांचाही विशेष सन्मानपूर्वक सहभाग होता.
कार्यक्रमाचे सुत्रसंचालन आणि संयोजन श्री प्रमोद पाटील यांनी अत्यंत नेटकेपणाने केले.
हा कार्यक्रम केवळ पुरस्कार वितरण सोहळा नव्हता, तर तो होता सामाजिक बांधिलकीची आणि परिवर्तनाची नवी दिशा दाखवणारा एक संस्कृती महोत्सव.
छत्रपती शाहू महाराजांच्या विचारांना उजाळा देणारा आणि समाजकार्याच्या नव्या प्रेरणांना जन्म देणारा हा गौरव सोहळा निश्चितच राज्यातील युवकांसाठी एक प्रेरणास्थान ठरणार आहे.
📸 विशेष छायाचित्रे, मान्यवरांच्या मुलाखती व व्हिडीओ पाहण्यासाठी भेट द्या:
🌐 RJNEWS27MARATHI.COM
