सोनं सापडलं… पण मन सोन्याहूनही मौल्यवान निघालं!
Rjnews27 मराठी – रमेश बनसोडे
अडीच तोळ्यांचा लाखो रुपये किमतीचा गंठण सापडूनही मोह आवरला; इनामगावातील वनिता व गोकुळ दळवी दांपत्याने जपली माणुसकीची श्रीमंती
इनामगाव, ता. शिरूर :
आजच्या काळात सोन्याच्या किमती दिवसेंदिवस वाढत असताना, रस्त्यात किंवा हाताशी आलेले काही तोळे सोनेही अनेकांच्या मनाची परीक्षा घेणारे ठरू शकते. मात्र, परिस्थिती गरिबीची असली तरी मनाची श्रीमंती मोठी असेल, तर प्रामाणिकपणाची किंमत सोन्यापेक्षाही अधिक असते, याचा प्रत्यय शिरूर तालुक्यातील इनामगाव येथे आला आहे. इस्त्रीसाठी आलेल्या कपड्यांच्या गठ्ठ्यात तब्बल अडीच तोळ्यांचा सोन्याचा गंठण सापडल्यानंतर तो स्वतःकडे न ठेवता मूळ मालकाच्या स्वाधीन करणाऱ्या वनिता आणि गोकुळ दळवी या दांपत्याने माणुसकीचा आणि प्रामाणिकपणाचा आदर्श समाजासमोर ठेवला आहे.
इनामगाव येथील वनिता आणि गोकुळ दळवी हे दांपत्य छोटासा लॉन्ड्रीचा व्यवसाय करून आपल्या संसाराचा गाडा हाकते. त्यांच्याकडे गुंठाभरही शेती नाही. रोज मिळेल त्या कामातून कुटुंबाचा उदरनिर्वाह करताना अनेक आर्थिक अडचणींचा सामना करावा लागतो. मात्र, याच बेताच्या परिस्थितीत त्यांच्या हातात लाखो रुपये किमतीचे सोने आले आणि तेव्हा त्यांच्या मनाची खरी श्रीमंती समोर आली.
लॉन्ड्रीच्या कामानिमित्त कपड्यांचा गठ्ठा हाताळत असताना दळवी दांपत्याला त्यामध्ये अडीच तोळ्यांचा सोन्याचा गंठण आढळून आला. सध्याच्या सोन्याच्या दरानुसार या गंठणाची किंमत साधारण तीन ते चार लाख रुपये असल्याचे सांगितले जात आहे. आर्थिक परिस्थिती बेताची असताना एवढ्या मोठ्या किमतीचे सोने सहज हातात येणे ही मोठी बाब होती. मात्र, दळवी दांपत्याने क्षणाचाही विलंब न करता हा दागिना आपला नसल्याचे मनाशी पक्के केले.
‘हे आपलं नाही, ज्याचं आहे त्याला परत मिळालं पाहिजे,’ या साध्या विचारातून त्यांनी गंठणाच्या मालकाचा शोध घेण्यास सुरुवात केली. कोणताही स्वार्थ न ठेवता संबंधितांना माहिती देत त्यांनी हा दागिना त्याच्या मूळ मालकापर्यंत पोहोचवण्यासाठी प्रयत्न केले.
अखेर हा सोन्याचा गंठण सागर काळे यांचा असल्याचे समोर आले. त्यानंतर वनिता आणि गोकुळ दळवी यांनी तो प्रामाणिकपणे काळे यांच्या स्वाधीन केला. लाखो रुपयांचे सोने हातात असूनही त्याचा मोह न होणे आणि परिस्थितीपेक्षा संस्कारांना महत्त्व देणे, हीच दळवी दांपत्याची खरी ओळख ठरली.
या घटनेने एक महत्त्वाचा प्रश्नही समाजासमोर उभा केला आहे—श्रीमंती नेमकी पैशांची असते की मनाची? दळवी दांपत्याकडे मोठी शेती नाही, मोठा व्यवसाय नाही किंवा आर्थिक संपन्नता नाही; मात्र दुसऱ्याच्या हक्काच्या वस्तूवर डोळा न ठेवण्याइतकी प्रामाणिक मूल्यांची श्रीमंती त्यांच्या अंगी आहे.
दळवी दांपत्याच्या या प्रामाणिकपणाचे इनामगावसह संपूर्ण पंचक्रोशीत कौतुक होत आहे. ग्रामस्थांनी त्यांचा सन्मान करून त्यांच्या या कृतीचे अभिनंदन केले. तसेच शिरूर-हवेलीचे विद्यमान आमदार माऊली कटके यांच्या पत्नी मनिषा कटके यांनीही इनामगाव येथे येऊन वनिता आणि गोकुळ दळवी दांपत्याचा सन्मान केला.
आजच्या धावपळीच्या आणि पैशाला सर्वाधिक महत्त्व दिल्या जाणाऱ्या काळात दळवी दांपत्याची ही कृती निश्चितच प्रेरणादायी ठरली आहे. हातात सोनं आलं, पण मनाचा तोल ढळला नाही; उलट त्यांच्या प्रामाणिकपणाने माणुसकीचं सोनं अधिक उजळलं.
वनिता आणि गोकुळ दळवी यांनी दाखवून दिले की, घरात किती सोनं आहे यापेक्षा मनात किती प्रामाणिकपणा आहे, यावरच माणसाची खरी श्रीमंती ठरते.
