गुंडागिरीचा सुळसुळाट – प्रेमविवाहाचा राग मनात ठेवून तरुणावर कोयत्याने हल्ला….

गुंडागिरीचा सुळसुळाट – प्रेमविवाहाचा राग मनात ठेवून तरुणावर कोयत्याने हल्ला

टाकळीहाजी, जिल्हा पुणे | दिनांक – 6 जुलै 2025
टाकळीहाजी (ता. शिरुर) येथे गुंड प्रवृत्तीच्या तरुणांनी भरदिवसा दुकानात घुसून एका युवकावर कोयत्याने हल्ला करून जीवे मारण्याचा प्रयत्न केला. प्रेमविवाह केल्याचा राग मनात धरून हा हल्ला करण्यात आल्याचे फिर्यादीने सांगितले आहे.

दत्तात्रय हौशीराम वाघ (वय 22), हे टाकळीहाजी येथे कुंडाई मेन्स पार्लर चालवतात. त्यांचा दोन महिन्यांपूर्वी जीवन रविंद्र गायकवाड नामक मुलीशी प्रेमविवाह झाला होता. या विवाहामुळे संतप्त झालेल्या आरोपींनी त्यांच्या दुकानात घुसून तोडफोड केली आणि कोयत्याने त्यांच्यावर प्राणघातक हल्ला केला.

आरोपींची माहिती:

1. जीवन रविंद्र गायकवाड, रा. कानगाव, ता. दौंड

2. शाहरूख बाबू शेख, वय 26, रा. पाटस, ता. दौंड

3. प्रशांत हनुमंत साठे, वय 19, रा. पाटस, ता. दौंड

फिर्यादीच्या माहितीनुसार, हल्लेखोरांनी लोखंडी कोयत्याने त्यांच्या डाव्या हातावर, पाठीवर आणि मनगटावर वार केले. शिवाय, “तुला जिवंत ठेवणार नाही” अशी धमकीही दिली. घटनास्थळी गोंधळ उडाल्याने आजूबाजूच्या नागरिकांमध्ये भीतीचं वातावरण निर्माण झालं.

ही घटना कुठल्याही सामान्य वादातून न होता, गुंड प्रवृत्तीच्या मानसिकतेचा नमुना असल्याचं स्थानिक नागरिकांचं म्हणणं आहे. प्रेमविवाहामुळे एखाद्याच्या जिवावर उठणं म्हणजेच कायद्याला आणि संविधानिक हक्कांना खुलेआम आव्हान देण्यासारखं आहे.

पोलीस तपास सुरु
शिरुर पोलीस ठाण्यात आरोपींविरोधात गुन्हा दाखल करण्यात आला असून पोलिसांकडून पुढील तपास सुरु आहे. या गुन्ह्यामुळे शिरुर, दौंड परिसरातील गुंडगिरी आणि जातीय राजकारणाच्या शक्यतेवरही चर्चा सुरू झाली आहे

संपादकीय निरीक्षण.
हा प्रकार म्हणजे समाजातील वाढती असहिष्णुता, प्रेमविवाहांना विरोध, आणि गुन्हेगारी वृत्तीचा विकृत विस्फोट आहे. कायद्याची भीती न बाळगता खुलेआम दुकानात घुसून कोयत्याने हल्ला केला जाणं म्हणजेच गावात गुन्हेगारांची मनमानी सुरू असल्याचं लक्षण आहे. पोलिसांनी या प्रकरणात कठोर कारवाई करून समाजात कायद्याचा धाक निर्माण करणे अत्यावश्यक आहे.