शिरूर तालुक्यातील इचकेवाडी वळणावर गंभीर अपघात – निष्काळजी वाहनचालकामुळे दोन जण जखमी…

शिरूर तालुक्यातील इचकेवाडी वळणावर गंभीर अपघात – निष्काळजी वाहनचालकामुळे दोन जण जखमी

इचकेवाडी वळणावर भरधाव कारचा अपघात; दोन जण जखमी, पोलिसांत अज्ञात चालकावर गुन्हा दाखल

शिरूर (जि. पुणे) – शिरूर तालुक्यातील कवठे येमाई गावच्या हद्दीत इचकेवाडी येथील खार ओढा वळणावर २५ जून रोजी सायंकाळी एक गंभीर अपघात घडला. भरधाव वेगात असलेल्या मारुती इरटीगा कारने नियंत्रण सुटल्याने झालेल्या या अपघातात दोन युवक जखमी झाले असून, याप्रकरणी शिरूर पोलीस ठाण्यात अज्ञात वाहनचालकाविरुद्ध गुन्हा दाखल करण्यात आला आहे.

संदीप बाळू क-हे (वय २९, रा. रामलिंग करेवाडा, शिरूर) यांनी दिलेल्या तक्रारीनुसार, ते आणि त्यांचा मावस भाऊ दौलत तिखोळे हे दोघे प्रवास करत असताना MH 02 DJ 3722 या क्रमांकाची इरटीगा कार अत्यंत वेगात आणि निष्काळजीपणे चालवत होती. अचानक झालेल्या या अपघातात दोघे जण जखमी झाले. जखमींवर शिरूर येथील शासकीय रुग्णालयात उपचार करण्यात आले.

दरम्यान, इरटीगा कारमधील अज्ञात चालक व इतर व्यक्तींना पारगाव (ता. आंबेगाव) येथील खासगी रुग्णालयात दाखल करण्यात आले. काही दिवसांनी तब्येत सुधारल्यानंतर संदीप क-हे यांनी शिरूर पोलीस ठाण्यात तक्रार दाखल केली.

पोलिसांनी गुन्हा रजि. नं. 456/2025 अंतर्गत अज्ञात चालकाविरोधात भारतीय दंड संहितेच्या कलम 281, 125(a), 125(b), 324(4) आणि मोटार वाहन कायद्याच्या कलम 184 नुसार गुन्हा दाखल केला आहे.

या घटनेचा तपास पोलीस हवालदार आगलावे यांच्या मार्गदर्शनाखाली सुरू आहे. इचकेवाडी वळणावर यापूर्वीही अपघात घडले असून, स्थानिक नागरिकांनी या ठिकाणी वाहतुकीसाठी योग्य त्या उपाययोजना कराव्यात, अशी मागणी केली आहे.