विठुरायाच्या भेटीला निघाली भक्तीची वाघेश्वरी वारी: मांडवगण फराट्यातून प्रेम, श्रद्धा आणि सेवाभावाने पालखी प्रस्थान…

विठुरायाच्या भेटीला निघाली भक्तीची वाघेश्वरी वारी: मांडवगण फराट्यातून प्रेम, श्रद्धा आणि सेवाभावाने पालखी प्रस्थान

प्रतिनिधी – अल्लाउद्दीन अलवी, मांडवगण फराटा (ता. शिरूर, जि. पुणे)
श्रद्धेचा दरवळ, सेवाभावाचा मंत्र आणि भक्तीचा ध्यास घेऊन मांडवगण फराटा येथील श्री वाघेश्वर महाराज पालखी सोहळा दिनांक २३ जून २०२५ रोजी उत्साही वातावरणात पंढरपूरच्या दिशेने प्रस्थान करताना दिसला. सगळं गाव विठुनामाच्या गजरात न्हालं होतं आणि संतांच्या पावन चरणांनी गाव पावन झालं होतं.

या भक्तिमय सोहळ्याला सुरुवात झाली सिद्ध सद्गुरु योगी शांतिनाथ महाराज (पंढरपूर) यांच्या हस्ते वाघेश्वर मंदिरात पालखी पूजनाने. पूजनानंतर पंचपदी घेऊन पालखीने विठुरायाच्या भेटीसाठी प्रस्थान केलं.

मान्यवरांची मोठी उपस्थिती

या प्रसंगी अनेक राजकीय, सामाजिक, आणि धार्मिक क्षेत्रातील मान्यवरांनी उपस्थिती लावली होती. यामध्ये आमदार माऊली कटके, अशोक पवार (माजी आमदार), प्रदीप कंद (माजी जि.प. अध्यक्ष), रेखा बांदल (संचालिका जिजामाता बँक), राहुल पाचर्णे (जिल्हा नियोजन समिती सदस्य), राजेंद्र नागवडे (श्रीगोंदा कारखाना चेअरमन), वासुदेव नाना काळे (प्रदेशाध्यक्ष, भाजपा), राहुल कुल (आमदार, दौंड), रमेश आप्पा थोरात (माजी आमदार, दौंड), समीक्षा फराटे पाटील (सरपंच) इत्यादींचा समावेश होता.

२४ वर्षांची अखंड परंपरा

या पालखी सोहळ्याचं नेतृत्व गेली २४ वर्षे ह.भ.प. सर्जेराव फराटे गुरुजी यांच्याकडे असून, त्यांच्यासोबत केशवराव, संभाजी, महादेव, बाळासाहेब, विश्वास काका फराटे आणि इतर मंडळी कार्यरत आहेत. बैलजोडी सेवा अविनाश चंद्रकांत फराटे यांनी दिली आहे.

महिला सन्मान आणि आरोग्य सेवा

या वर्षी पालखी प्रस्थानाच्या दिवशी एक खास उपक्रम राबवण्यात आला — कै. हिराबाई ज्ञानदेव कदम यांच्या स्मरणार्थ माजी सरपंच शिवाजी अण्णा कदम यांच्या वतीने पायी वारी करणाऱ्या महिलांना साडी भेट देण्यात आली. याशिवाय वारी मार्गावर वैद्यकीय सेवा, औषधे आणि मदतीसाठी मांडवगण फराट्याच्या सर्व हॉस्पिटल्स आणि आरोग्य केंद्रांनी पुढाकार घेतला आहे.

पालखीचा प्रवास – पंढरीच्या वाटेवर

वाघेश्वर पालखीचा प्रवास नानविज, आलेगाव, मलठण, भिगवन, डाळज नं.२, शेळगाव, सराफवाडी, लाखेवाडी, माळीनगर, श्रीपूर, कुरोली, वाखरी होत ५ जुलै रोजी पंढरपूर येथे पोहोचणार आहे. ७ जुलै रोजी पंढरपूर येथे पालखी विसावणार असून चहापाण्याची सोय करण्यात येणार आहे.

पंढरीच्या दिशेने एकतेचा संदेश

पालखी सोहळ्याने केवळ श्रद्धेचा नाही तर सामाजिक सलोख्याचा, भक्तिभावाचा आणि समर्पणाचा संदेश दिला आहे. हजारो वारकरी, महिला भगिनी आणि ग्रामस्थ विठुनामाचा गजर करत पंढरीच्या दिशेने निघाले आहेत. हे दृश्य मनाला चटका लावणारे नव्हे, तर उर्जा देणारे ठरले.

“विठ्ठल…विठ्ठल…” या गजरात मांडवगण फराट्याच्या वाघेश्वर पालखीने भक्ती, सेवा आणि संस्कृती यांचा संगम साकारत पंढरीकडे प्रस्थान केलं आहे.

ही बातमी RJNEWS27MARATHI.COM साठी खास सादर केली आहे.
– बातमीकार: अल्लाउद्दीन अलवी