रांजणगाव तिहेरी हत्याकांड – संपूर्ण परिसरात खळबळ, पोलिसांचा तपास वेगवान; नागरिकांच्या सहकार्याचे आवाहन

रांजणगाव तिहेरी हत्याकांड – संपूर्ण परिसरात खळबळ, पोलिसांचा तपास वेगवान; नागरिकांच्या सहकार्याचे आवाहन

शिरूर प्रतिनिधी | RJNEWS27MARATHI.COM

रांजणगाव गणपती (ता. शिरूर) येथे घडलेल्या तिहेरी हत्याकांडाने संपूर्ण शिरूर तालुक्यासह पुणे जिल्ह्यात खळबळ उडवली आहे. एक महिला आणि तिच्या दोन चिमुकल्या मुलांची निर्घृण हत्या झाल्याची घटना समोर येताच, पोलीस यंत्रणेसह संपूर्ण समाज हादरून गेला आहे. या गुन्ह्याचा तपास वेगाने सुरू असून, लवकरच आरोपी पोलिसांच्या तावडीत सापडतील, असा विश्वास पुणे ग्रामीण पोलीस अधीक्षक संदीप सिंग गिल यांनी व्यक्त केला आहे.

आज पोलीस अधीक्षक संदीप गिल यांनी रांजणगाव एमआयडीसी पोलीस ठाण्यास भेट दिली. यावेळी पोलीस निरीक्षक महादेव वाघमोडे यांच्यासह तपास पथक उपस्थित होते. या भीषण घटनेच्या पार्श्वभूमीवर संदीप गिल यांनी पत्रकारांशी संवाद साधताना म्हटले की, “या प्रकारच्या गुन्ह्यांचा तपास करताना वेळ आणि संयम दोन्ही आवश्यक असते. मात्र, पोलिसांची विशेष टीम सीसीटीव्ही फुटेज, कॉल डिटेल्स आणि तांत्रिक पुरावे यांच्या आधारे गुन्हेगारांचा माग काढत आहे.”

गुन्ह्यात वापरलेले कुठलेही निशाण अद्याप स्पष्ट नसले तरी महिलेसोबत दोन निष्पाप मुलांची अमानुष हत्या ही अत्यंत गंभीर बाब असून, हे प्रकरण अधिक खोलवर असल्याचे संकेत मिळत आहेत. प्राथमिक तपासात राज्यातील मिसिंग रिपोर्टचीही पडताळणी करण्यात आली असून, काही संशयित महिला व मुलांचे फोटो राज्यभरातील पोलीस ठाण्यांना पाठवले आहेत. या फोटोवरून कुणी ओळख पटवू शकेल, अशी आशा व्यक्त करण्यात येत आहे.

पोलीस नागरिकांशी संवाद साधत असून, कोणाकडे याबाबत माहिती असल्यास ती पोलिसांना तत्काळ कळवावी, असे आवाहन करण्यात आले आहे. माहिती देणाऱ्याची ओळख पूर्णतः गोपनीय ठेवली जाईल, असेही पोलीस अधीक्षक गिल यांनी स्पष्ट केले.

पोलीस अधीक्षक संदीप गिल यांचे नागरिकांना आवाहन 

> “ही केवळ एक गुन्हेगारी घटना नाही, तर मानवतेच्या मूलभूत मूल्यांवर घाव आहे. समाजातील प्रत्येक सजग नागरिकाने या तपासात आपापल्या परीनं मदत करणे ही काळाची गरज आहे. कोणतीही लहान माहितीही या प्रकरणात महत्त्वपूर्ण ठरू शकते.”

दरम्यान, शिरूर तालुक्यातील सर्व पोलीस पाटलांची यामध्ये मदत घेतली जात असून, ग्रामपातळीवर माहिती मिळवण्यासाठी विशेष मोहिमा हाती घेण्यात येणार आहेत.

संपर्कासाठी –

रांजणगाव एमआयडीसी पोलीस स्टेशन – पोलीस निरीक्षक महादेव वाघमोडे

पोलीस अधीक्षक, पुणे ग्रामीण – संदीप सिंग गिल
(संपूर्ण गोपनीयता राखली जाईल)

RJNEWS27MARATHI.COM | सत्याच्या शोधात
[रमेश बनसोडे], प्रतिनिधी – शिरूर