सर्व ग्रामस्थ व शेतकरी बांधवांसाठी अत्यंत महत्त्वाची सूचना : वीज सुरक्षेचा धोक्याचा इशारा!

सर्व ग्रामस्थ व शेतकरी बांधवांसाठी अत्यंत महत्त्वाची सूचना : वीज सुरक्षेचा धोक्याचा इशारा!

वादळी वारे, विजांचा कडकडाट आणि तुटलेल्या वीज तारांनी गावकऱ्यांच्या जिवाला धोका

Rjnews27 मराठी | प्रतिनिधी

संपूर्ण महाराष्ट्रात गेल्या काही दिवसांपासून पावसाने हजेरी लावली असली, तरी या पावसासोबत वादळी वारे आणि विजांच्या कडकडाटामुळे ग्रामीण भागांमध्ये अनेक ठिकाणी वीज पोल कोसळणे, तारा तुटणे, झाडे उन्मळून पडून वीज वाहिन्यांवर आदळणे अशा गंभीर घटना घडत आहेत. यामुळे ग्रामस्थांच्या जिवीताला धोका निर्माण झाला असून महावितरणने तातडीने खबरदारी घेण्याचे आवाहन केले आहे.

ग्रामस्थांना महावितरणचा इशारा:
महावितरण विभागाने जारी केलेल्या सूचनेनुसार, वीज तारा जमिनीवर पडलेल्या असतील किंवा पोल वाकलेले, पडलेले असतील, तर त्यांच्याजवळ जाऊ नये. अशा ठिकाणी मुले आणि जनावरे जाऊ नयेत, याची विशेष काळजी घेण्याचे आवाहन करण्यात आले आहे. वीज वाहिन्यांना स्पर्श केल्यास जीवघेणा शॉक बसू शकतो.

तांत्रिक बिघाड असल्यास तात्काळ संपर्क साधा:
अशी कुठलीही घटना लक्षात आल्यास आपल्या विभागातील महावितरणचे वायरमन, ऑपरेटर किंवा जवळच्या सब स्टेशनला तत्काळ माहिती देण्याचे निर्देश देण्यात आले आहेत. वेळेत दिलेल्या माहितीमुळे संभाव्य मोठ्या दुर्घटना टाळता येऊ शकतात.

महावितरणकडून सतर्कतेचे आवाहन:
महावितरणच्या निवेदनात स्पष्ट सांगण्यात आले आहे की, “एक छोटीशी असावधता तुमचं आणि तुमच्या कुटुंबाचं आयुष्य धोक्यात घालू शकते. त्यामुळे कृपया कोणतीही जोखीम न पत्करता, शक्य तितक्या लवकर प्रशासनाशी संपर्क साधा.”

महत्वाचे सुरक्षा उपाय:

• जमिनीवर पडलेल्या वीज तारांना अजिबात हात लावू नका.
• वीज पोल कोसळलेले किंवा वाकलेले असतील, तर त्यांच्याजवळ जाऊ नका.
• लहान मुलांना आणि जनावरांना त्या परिसरात जाऊ देऊ नका.
• सुरक्षित अंतर राखा आणि शक्य असल्यास इतर नागरिकांनाही सतर्क करा.

सावध राहा, सुरक्षित राहा – आपला महावितरण

(अधिक माहितीसाठी आणि तातडीच्या संपर्कासाठी स्थानिक वीज उपकेंद्राशी त्वरित संपर्क साधावा.)

फॉलोअप रिपोर्ट लवकरच Rjnews27 मराठीवर वाचा.