शिरूर पोलिस ठाणे हद्दीत अपघात; निष्काळजी टँकर चालकावर गुन्हा दाखल

 शिरूर पोलिस ठाणे हद्दीत अपघात; निष्काळजी टँकर चालकावर गुन्हा दाखल

शिरूर, पुणे (प्रतिनिधी):

दि. 5 मे 2025 रोजी रात्री 10 वाजण्याच्या सुमारास शिरूर पोलिस ठाण्याच्या कार्यक्षेत्रात असलेल्या न्हावरा ते केडगाव चौफुला मार्गावर घोडगंगा सहकारी साखर कारखान्याच्या मुख्य प्रवेशद्वारासमोर दोन चारचाकी वाहनांचा भीषण अपघात घडला. यामध्ये एर्टिगा आणि क्रेटा या दोन कारना जबर नुकसान झाले असून, अपघाताची जबाबदारी भरधाव वेगात आणि निष्काळजीपणे वाहन चालवणाऱ्या आयशर टँकर चालकावर टाकण्यात आली आहे.

प्रकरणी मुरलीधर कृष्णाजी निंबाळकर (वय 65 वर्षे, व्यवसाय शेती, रा. पारगाव सालुमालु, ता. दौंड, जि. पुणे) यांनी शिरूर पोलिस ठाण्यात फिर्याद दिली आहे. त्यांनी सांगितले की, ते स्वतःच्या MH 12 LD 8771 क्रमांकाच्या एर्टिगा कारने रस्त्याच्या डाव्या बाजूने प्रवास करत असताना, त्यांच्या मागून भरधाव वेगात आलेल्या MH 43 DP 6652 क्रमांकाच्या आयशर टँकरने त्यांच्या कारच्या उजव्या मागील भागाला जोरदार धडक दिली. यानंतर टँकरने पुढे असलेल्या MH 12 WE 1150 क्रमांकाच्या क्रेटा कारलाही पाठीमागून धडक दिली.

टँकर चालक सचिन सदाशिव लोंढे (रा. चिंचोली, ता. म्हाडा, जि. सोलापूर) याने रहदारीचे नियम धाब्यावर बसवून, बेदरकारपणे वाहन चालवून हा अपघात घडवला असल्याचा आरोप करण्यात आला आहे. या अपघातात दोन्ही कारचे मोठ्या प्रमाणावर नुकसान झाले असले तरी कोणतीही जीवितहानी झालेली नाही, हे विशेष.

या घटनेप्रकरणी शिरूर पोलिस ठाण्यात गुन्हा दाखल करण्यात आला आहे. गुन्हा रजिस्टर नंबर 307/2025 नुसार भा.दं.सं. 281, 324(4) आणि मोटार वाहन कायदा कलम 184 अंतर्गत टँकर चालकावर कायदेशीर कारवाई करण्यात आली आहे. तपासाची जबाबदारी सफौ राजेंद्र बनकर यांच्याकडे असून, पुढील कार्यवाही पो.हवा. वाडेकर (2122) हे करत आहेत.

अपघाताचे नेमके कारण, वाहनांची स्थिती व साक्षीदारांचे तपशील लवकरच स्पष्ट होण्याची शक्यता असून, अधिकृत पोलीस तपास अहवालाची प्रतीक्षा आहे.