CNG पुरवठ्याच्या अडचणींमुळे पुणे ग्रामीणमध्ये CNG विक्री स्थगित: PDA चा निर्णायक पाऊल

पुणे, १ मे २०२५ – पुणे पेट्रोल डिलर्स असोसिएशनने (PDA) आजपासून पुणे ग्रामीण भागातील टॉरेंट गॅसद्वारे संचालित सर्व पंपांवर कॉम्प्रेस्ड नॅचरल गॅस (CNG) विक्री स्थगित करण्याची घोषणा केली आहे. हा निर्णय ऑफलाइन पद्धतीने, म्हणजेच ट्रकद्वारे सीएनजी पुरवठा होणाऱ्या स्टेशनांवर लागू करण्यात आला आहे.

PDA ने स्पष्ट केले की, गेल्या अनेक महिन्यांपासून टॉरेंट गॅसकडून होणारा अनियमित पुरवठा आणि दररोज सहा ते आठ तास पुरवठ्यात खंड पडत असल्यामुळे हा निर्णय घेण्याची वेळ आली. त्यामुळे ग्राहकांमध्ये गोंधळ, लांबच लांब रांगा आणि नाराजी वाढत चालली आहे.

असोसिएशनचे अध्यक्ष ध्रुव रुपारेल म्हणाले, “पुन्हापुन्हा तक्रारी करूनही टॉरेंट गॅसकडून कोणतीही ठोस कारवाई झाली नाही. याचा सर्वाधिक फटका सार्वजनिक वाहतूक, खाजगी वापरकर्ते आणि आपत्कालीन सेवेवर अवलंबून असलेल्या नागरिकांना बसत आहे. वाहतुकीसह लोकांच्या उपजीविकेलाही त्यामुळे मोठा फटका बसत आहे.”

PDA च्या मते, हा निर्णय लोकांच्या हितासाठी घेतला असून प्रशासनाच्या दुर्लक्षाकडे लक्ष वेधण्यासाठी आणि तत्काळ उपाययोजना घडवून आणण्यासाठी हा दबावात्मक पाऊल उचलण्यात आला आहे. त्यांनी जिल्हाधिकारी आणि इतर संबंधित अधिकाऱ्यांना सीएनजी पुरवठा सुरळीत करण्यासाठी तातडीने हस्तक्षेप करण्याचे आवाहन केले आहे.

या घोषणेमुळे स्थानिक वापरकर्त्यांमध्ये चिंता वाढली आहे. तळेगावमधील ऑटो-रिक्षा चालक समीर गायकवाड यांनी नाराजी व्यक्त करत म्हटले, “आम्ही तासन्तास रांगेत उभे राहतो आणि शेवटी गॅस मिळत नाही. आता विक्रीच बंद झाली, तर आमची उपजीविका कशी चालेल? आम्ही पूर्णपणे सीएनजीवर अवलंबून आहोत.”

सध्या या निलंबनाची कालमर्यादा निश्चित करण्यात आलेली नाही. मात्र PDA ने हा निर्णय तात्पुरता असल्याचे सांगून प्रशासनाकडून त्वरित पावले उचलली जात नाहीत, तर अधिक तीव्र परिणामांची शक्यता वर्तवली आहे.