IAS संजीव हंस प्रकरणात ईडीची मोठी कारवाई – अभियंत्याच्या बंगल्यातून ११ कोटी जप्त!

IAS संजीव हंस प्रकरणात ईडीची मोठी कारवाई – अभियंत्याच्या बंगल्यातून ११ कोटी जप्त!

पटणा: अंमलबजावणी संचालनालयाने (ईडी) भ्रष्टाचाराविरोधात मोठी कारवाई करत बिहारमधील वरिष्ठ सरकारी अधिकाऱ्यांवर छापेमारी केली. यामध्ये बांधकाम विभागाचे मुख्य अभियंता तारिणी दास यांच्या बंगल्यातून तब्बल ११ कोटी रुपयांची बेहिशोबी रोकड जप्त करण्यात आली. या छाप्यामुळे प्रशासनात मोठी खळबळ उडाली आहे.

ईडीकडे यापूर्वीच माहिती होती की पटणातील उच्चभ्रू भागात असलेल्या एका बंगल्यात मोठ्या प्रमाणावर बेनामी संपत्ती आहे. तपास अधिकाऱ्यांनी छापा टाकल्यावर इतकी मोठी रोकड आढळली की नोटा मोजण्यासाठी चार मशीन मागवाव्या लागल्या. तब्बल ८ तास सतत नोटा मोजण्याचे काम सुरू होते.

IAS अधिकारी संजीव हंस यांच्याशी संबंधित प्रकरण

तारिणी दास यांच्यावर सरकारी निविदा व्यवस्थापनातील गैरव्यवहाराचे आरोप असून, त्यांचा संबंध आयएएस अधिकारी संजीव हंस यांच्या प्रकरणाशी असल्याचा संशय ईडीला आहे. त्यामुळेच ईडीने त्यांच्या नातेवाईकांवरही छापेमारी केली.

निवृत्तीनंतरही मोठी जबाबदारी!

तारिणी दास हे ३१ ऑक्टोबर २०२४ रोजी मुख्य अभियंता पदावरून निवृत्त झाले होते. मात्र, सेवानिवृत्तीनंतर लगेचच नोव्हेंबरमध्ये त्यांना दोन वर्षांसाठी पुन्हा नियुक्त करण्यात आले. एवढेच नव्हे तर, त्यांना बिल्डिंग कन्स्ट्रक्शन कॉर्पोरेशनमध्ये मुख्य महाव्यवस्थापकपदाचा अतिरिक्त कार्यभारही देण्यात आला.

प्रशासनात मोठी खळबळ – आणखी खुलास्यांची शक्यता

ईडीच्या या मोठ्या कारवाईने बिहारमधील वरिष्ठ अधिकाऱ्यांमध्ये घबराट पसरली आहे. या प्रकरणात आणखी काही बड्या अधिकाऱ्यांचा सहभाग असण्याची शक्यता वर्तवली जात आहे. त्यामुळे ईडीच्या टीमने तपासाची व्याप्ती वाढवली असून, सरकारी कंत्राटे आणि भ्रष्टाचाराच्या साखळीचा पूर्ण शोध घेण्याचे काम सुरू आहे.

या प्रकरणात आणखी धक्कादायक खुलासे होण्याची शक्यता असून, ईडीच्या पुढील तपासाकडे संपूर्ण राज्याचे लक्ष लागले आहे.